“BEGIRADME”, ZER ONDO NAGOEN HEMEN!

 

Hasteko , Foruako ingurua eta gure barnetegiko kidea ezagutu genituen. Lehenengo bisita Gernikara izan zen. Igorrek, gure gidari jatorrak , kontatu zigun Gernikako Historia.

Momentu hartatik orain arte , txango pila bat egin dugu.

OMAKO BASOA

Kolore ezberdinak , hizkuntza berdina.

HONDARTZA

Euskadi Tropikala!!

GAZTELUGATXE

Gora eta behera, eta euskara barrura

KANOAK

Bidaia bukatzeko, Beharrezko atsedena indarrak biltzeko.



LOTSAK KANPORA!

LOTSAK KANPORA!

Etorri baino lehen euskaraz hitz egiteko lotsa geneukan. Denda batera joaten ginen eta gure asmoa euskaraz egitea zen, baina, momentuan, erdaraz egiten genuen, edo baita ospa ere.

Barnetegiko giroari esker, lotsa horiek kanporatzen ari gara. Bai irakasle, bai ikaskideekin, konfiantza lortzen ari gara eta orain gai gara Gernikara joateko eta ia-ia erosketa guztiak euskaraz egiteko (edo behintzat saiatu) lotsarik gabe.

Oraindik hanka sartzen dugu gehienetan, baina saiatzen jarraitzen dugu, eta arraro begiratzen bagaituzte, “ikasten ari gara” esaten diegu. Eta zer edo zer ondo esaten dugunean gogo gehiago lortzen dugu ikasten jarraitzeko.



EMOZIOAK PIL-PILEAN

Atzo kristoren pintxo lehiaketa egin genuen. Goiz-goizean elkartu ginen taldeak osatzeko eta dirua banatzeko. A ze sorpresa hamar euroko aurrekontua bakarrik genuela jakitean! Dirua hartu eta Gernikako azokara. Talde bakoitzak erosi behar zituen bere osagaiak pintxoak prestatzeko. Buruari mila buelta eman eta gero, ideiak hasi ziren sortzen. Arratsalde arte ezin genituen gure pintxoak martxan jarri.

Txandak egin genituen sukaldatzeko, arazorik gabe. Oso urduri geunden, denbora gutxirekin, hamahiru pintxo prestatu behar genituen eta. Baina ez zen hori bakarrik, izan ere, aurkezpenak ere prestatu behar genituen. Sukaldea hankaz gora jarri genuen, usain ezberdinez beteta. Baina azkenean lortu genuen, gure pintxoak prest zeuden.

Orduan, momentu gogorrena iritsi zen: aurkezpenak. Bakoitzak bere erara egin zuen, batzuk dantza egiten, beste batzuk hitz egiten, edo ahal genuela bezala.

A ze “marroia” epaileentzat!!!! pintxo hoberena aukeratu behar zuten, eta ez genien lana erraztu.

Azkenean hoberenek irabazi zuten, baina besteok ere irabazle sentitu ginen.

Momentu onena iritsi zen: dastaketa!!!! Ardoz bustita, mahai inguruan, emozioak pil-pilean zeuden



Arantzako Barnetegia. Lehen asteko kronika.

A zer nolako astea zen barnetegiko lehengoa Arantzan!!

Aterpera iritsi bezain laster hasi ginen ‘horma hausteko’ jokoak egiten. Lehenik eta behin ikasi behar izan genituen gure izen guztiak, eta ez zen gatazka erraza, 50 lagun baino gehiago gara eta! Arratsalde hartan bertan gure ikasleen txapak jasotzen hasi ginen, eta egunak pasa ahala okerragoak izan ziren!

Hori jasateko zerbait aurkitu behar izan genuen. Zorionez, Arantzako bestak hasi ziren. Han gure trebetasuna aurkeztu genuen arantzako zortzikoa dantzatzen. Izan ere, arratsalde osoa pasatu genuen herriko bi neska oso jatorrekin dantza ikasten gauean plazan barregarri ez gelditzeko.

Baina ez pentsa dena garagardoa eta festa izan zenik, kultur egunak egon ere egon baitziren. Egunero izan dugu tailer edo txangoren bat ingurua ezagutzeko. Adibidez, Pasaiara hurbildu ginen eskuz egiten ari diren baleontzia ikustera Albaola museoan, eta Sanpedrotarra Arraun Elkartea ezagutzera. Nahiz eta euria barra-barra egin egun zoragarria zen. Eta zer esanik ez dauka Amaiaren bisita izan genuenean eta bertako euskalkia era dibertigarria landu genuenean. Behin hemengo jendea ulertzeko gauza izanda, bortzirietako konkistari ekin genion, eta Bera, Lesaka, Etxalar eta Igantzira jo genuen.

Igandean, behingoz, egun librea izanda, besteak bistaz galtzeko aukera izan genuen.

Hala ere, lehenengo astea nola izan zen ikusita, bigarren asteko irrikan gelditu ginen.

 

Sanpedrotarran denbora pasatzeko joko bat egiten



Agur, eta beti arte!

Blogeko azken sarrera hau, bi eguneko aje gozoaren ondoren, irakasleok idaztea erabaki dugu; zera esateko: oso gustura egon garela, horrelako (zuek bezalako) ikasleekin lan egitea plazera dela eta, batez ere, esateko: ESKER MILA!!!!!

Eskerrik asko ikasle guztiei, Aterpeko jendeari eta Arantzako herritarrei.

Laster arte, beraz… Adiorik ez!

Egin dugun azken ekintzaren argazkia da hauxe, Emakumeen Baratzean landatu ditugu, AEKren izenean, mugurdi eta ahabia bana. Hurrengo hamabostaldiko ikasleei egokituko zaie horiek zaintzea eta ureztatzea. Animo!

 



Kobazuloa eta pintxo-dastaketa

Gaurko tailerra bereziki desberdina izan da, espeleologia eta pintxo-txapelketa egin dugu eta! Egia esanda, batzuk pixka bat urduri egon gara hasieran, baina esperientziak benetan merezi izan du. Kobazuloan arrastaka sartu ondoren, ur garbi-garbia duen errekan gora joan gara eta estalaktita eta estalagmita mota desberdinak aurkitu ditugu, adibidez, estalagmita eszentrikoak, aurkitzeko oso zailak direnak. Eguna amaitzeko eta kobazuloan galdutako indarra berreskuratzeko, Aterpeko txuletaren eta pintxoen eta dastaketa egin dugu. Gaurkoa ere egun biribila!



BAZTANERA TXANGOA

Kaixo, irakurleok!

Gaur Baztan aldera txangoa egin dugu. Gure lehenbiziko egonaldia Bozetan, Arizkunen, egin dugu. Santxotena Museoa bisitatu dugu. Gero, gosea kentzeko, Elizondora joan gara bazkaltzera. Hala ere, lehenago Iruritara joan gara, Arkupe txokolate-dendara. Han bertan txokolatea nola egiten den ikasi dugu. Eta, gainera, cacao mota desberdinetako txokolatea dastatu dugu: Kubakoa, Costa Ricakoa eta Madagaskarrekoa.

Bazkaria eta gero Amaiurrera joan gara, gaztelu zaharra ikustera. Baina hori baino gehiago: Aranzadikoen azalpen historikoa entzun dugu. Eskerrik asko Juantxo, eskerrik asko Aitor, eta eskerrik asko Javier!

Egun oso interesgarria izan dela uste dugu. Gauza asko ikasi ditugu.

Ikusiko dugu nola amaituko den gure gaua. Izan ere, karaoke-gaua, eta gainera mozorrotuta, daukagulako.

Aio, eta bihar arte!

 



GAUR BERTSOTAN

BERTSO EGUNA DUGU GAURKOA

BENETAN EGUN HANDIA

ARRATSALDEAN MINTZODROMOA

EDERRA SOLASALDIA

TA JULENEKIN GUK EGIN DUGU

KRISTON BERTSO IKASTALDIA

BUKATU DUGU EGUN ITZEL HAU

EGITEN BERTSO-AFARIA



Egun beroa zentzu guztietan

Eguna hasteko, goizean irakasleek hiltzailearen jolasa azaldu digute. Gure artean hiltzaile eta laguntzaile bat daude eta izugarrizko hilketa egin dute egunean zehar. Baina klasean, nahiz eta termometroa lehertzear egon, AEKko ikasleok lan ederra egin dugu egunero bezala.

Klasearen ondoren Jonek (ikasle batek) cross-fit egiten irakatsi digu. Izerdituta amaitu dugunez, puxika gerrarekin elkar errefreskatu dugu herriko plazan. Beraz, gudari asko sortu dira gupidarik gabe.

Afaltzerakoan, Nafarroako mendigoizale talde bat topatu dugu Aterpean. Beraien artean, trikitixa batekin Kilmanjarora igo zena zegoen, eta noski, trikitixa tontorrean jo zuen.

Dena dela, egun bero hauek gauza onak ere ekartzen dituzte, orain pote batekin gau tropikala disfrutatzen ari gara blogean idazten dugun bitartean.

Bihar arte!



Goizetik gauera eta Arantzatik Berara

Kaixo:

Gaurko blogeko sarrera laburra izango da: Berako bestak dira eta arratsaldeko klasea amaitu ondoren hara joango gara, arratsaldea eta, agian, gauaren zatitxo bat han ematera.

Ez da izango, ordea, egingo dugun lehenbiziko parranda. Izan ere, atzo arratsaldean pintxipotea egon zen Arantzan eta afalaurretik poteo luzerik egin ez arren, afalostean Patxuko Nice-ren kontzertua egon zen.

Egia esan, kontzertua gauerdian amaitu bazen ere, gaua luzatu egin zen Arantzako Aterpen (batzuentzat, batez ere). Horretxegatik, pixka bat gogorra izan da goiza. Baina, ai, ene! Zenbat barre egin genuen!

Bihar arratsaldean libre izango dugu, ez dugu eskolarik. Bakoitzak nahi duena egiteko aprobetxatuko dugu. Hori dela eta, bihar ez dugu blogean ezer idatziko. Beraz, astelehenera arte, lagunok!

Besarkada bat, Bortzirietatik!