Korrika, euskararen aldeko lasterketa erraldoia, mundu zabalera hedatu da eta hainbat hizkuntza gutxituk hartu dute adibidetzat. Martxoan, Irlandan RITH 2014 egin zuten gaelikoaren sustapenerako eta maiatzean Ar Redadeg-ek jendez beteko ditu Bretainiako kale, errepide, auzoak...Izan ere, bretoieraren aldeko lasterketaren laugarren edizioari Morlaixen emango diote hasiera, maiatzaren 24an, eta Glomelen bukaera, hilaren 31n.

Iparraldeko AEK-ko lagunek azken egunean parte hartzera joateko autobusa antolatuko dute. Maiatzaren 29an (osteguna. Salbatore eguna) abiatuko dira goizeko 8etan, Baionako San Andres plazatik; eta ekainaren 1ean (igandea) bueltatuko dira, gaueko 9etan. Bidaiak 65 euro balio du. Interesa daukanak telefonoz edo posta elektronikoz izena eman dezake, hilaren 9a baino lehen: 05 59 25 76 09 // Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.

Gogoan izan bretoieraren aldeko lasterketan, gure Korrikan bezala, parte hartzeko modu asko dagoela: ziberkilometroak, materiala... Informazio guztia Ar Redadeg-en webgunean aurkituko duzue!