Urte berriarekin batera, euskara ikastaroak abiatuko ditugu AEKren hainbat euskaltegitan aurrez aurre zein online.

Galdetu hurbilen daukazun AEK-n: gure euskaltegietan · 673 200 100 // 946 464 000

Online ikastaroak:

A1, A2, B1, B2, C1 eta C2 mailak egiaztatzeko azterketak prestatzeko ikastaroak: urtarriletik martxora (75 ordu): 327 euro
C2 atarikoa: C1 gaindituta dutenentzat. Egokia euskara-maila hobetzeko edota hurrengo ikasturtean C2 maila egin nahi dutenentzat: urtarriletik martxora (75 ordu): 327 euro. C2 maila, 401 euro

Aurrez aurreko ikastaroak gure zenbait euskaltegitan: Iruñerria, Goierri (Beasain eta Ordizia), Uribe Kosta, Bilbo, Ermua, Portugalete..

23.KORRIKAren kantak dioen moduan...

"Ikasten bazabiltza
Egin gurekin
Elkar ulertu arte
Ekin ta ekin

Hizkuntzak ikastera
Bagoaz kanpora
Zergatik ez herrian
Euskara ahora"

Etorri AEKra euskara ikastera!!

472. zenbakian Gari abeslaria izango da protagonista nagusia, eta Hertzainaken kontzertuetarako 4 sarrera zozketatu ditugu harpidedunen artean

Azokan harpidetza egiten dutenek, prezio berezia ordaintzeaz gain, Zaldieroaren marrazkia duen poltsa jasoko dute opari

Zaldieroaren marrazkia daraman egutegia eskuratzeko aukera ere izango da Artekaleko 18.enean ipinitako standean

AEK-AIZU!k erakusmahaia jarriko du Durangoko Azokaren 57. edizioan. AEKren hainbat material didaktikoz gain, AIZU! aldizkariaren 472. zenbakia egongo da salgai bertan, inprentatik atera berria. Gari dakar azalean, musikari legazpiarra aukeratu baitugu elkarrizketa nagusiko protagonista izateko. Ez alferrik, berriki kaleratu baitu, Maldanbera taldearekin, bakarka egindako 27 urteko ibilbidea biltzen duen Zuzenean 2022 diskoa.

Halaber, Garik eman dio AIZU!ri zozketa egiteko aitzakia, aldizkariaren harpidedunen artean. Denon ahotan dagoenez, disko berria ez da Garik eskuartean duen proiektu bakarra: Hertzainak taldearen agurra izango diren kontzertuak ate joka dira eta, horren harira, AIZU!k bina sarrera zozkatuko ditu BECeko abenduaren 17ko eta Gasteizko urtarrilaren 6ko kontzertuetarako, bere harpidedun guztien artean. Beraz, Durangoko Azokan harpidetza egiteak ere zozketan parte hartzeko bide emango dio edonori, gainontzeko harpidedunekin batera. Harpidetza Azokan egiten duenak, gainera, prezio berezia ez ezik, oparia ere izango du oraingoan: Patxi Huarte Zaldieroak marrazturiko poltsa polit askoa. Harpidetzaz gain, aldizkariaren aurtengo ale solteak erosteko aukera ere egongo da Azokan bertan, AEK-AIZU!k Landako Gunean (Artekale, 18) jarriko duen standean. Ale soltea erosiz gero, erosleak poltsaren diseinu bera duen urteko egutegia jasoko du opari. Bestela, egutegia euro batean ere eskuratu ahal izango da.

Bestalde, Azokaz harago, aldizkaria bera ezagutarazteko kanpaina berezia ere egingo du AIZU!k abendu osoan zehar. Horretarako, Harrapatu aukera! lelopean, AIZU!ren ale bat (2023ko urtarrilekoa) doan eskuratzeko aukera eskainiko diogu hala nahi duen euskara ikasle orori. Horretarako, www.aizu.eus webgunera jo eta aldizkaria paperean edo PDF formatuan jasotzeko eskaria egin beharko da. Horrela, euskara ikasleentzako beren-beregi egindako aldizkaria ezagutzen ez duenak bertatik bertara ezagutu ahal izango du AIZU!ren eskaintza.

Iaz, Durangoko Azokan bertan, 0 zenbakia aurkeztu genuen tokian, ospatu genuen berrogeigarren urtemuga, eta aurten bueltan gatoz: 40+1!

Ostegunean (azaroak 24) Nafarroako Euskara Teknikariei prestakuntza saioa eskaini zieten Maialen Otegi eta Maialen Begiristain AHIZEko aholkulariek.

Saio teoriko-praktikoa izan zen eta euskahaldunaz eta ahalduntzeaz aritu ondoren, arlo sozioekonomikoan euskara txertatzeko gakoez aritu ziren, teorian jasotakoa praktikara eraman eta lanerako baliagarria izango zaien dekalogoa osatu genuen.

Urteak dira azaroaren 25a “Indarkeria Matxistaren Aurkako Eguna” izendatu zutenetik. Emakume* eta sexu/generoko disidenteon aurkako indarkeriak, ordea, ez du etenik izan epe horretan. Oraindik ere, indarkeriak aurpegi anitz dauzka, hamaika forma, eta gure eguneroko bizitzako eremu guztietan gertatzen da, hala nola lanean, eskoletan, korridoreetan, Whatsapp taldeetan...

Zoritxarrez, gure errealitatea ez da bestelakoa, ez gara bizi indarkeriarik gabeko eremu ideal batean. Jakin badakigu erasoak gertatzen direla. Badugu batzuen berri, eta aurre egiten saiatzen gara; beste askori, ordea, erasotuak bakarrik egin behar izaten die aurre.

Ahalduntzea, baina, ez da nahikoa: gizonek ulertu eta onartu behar dute pribilegiodunak direla, eta ezinbestekoa da pribilegio horiek baztertzeko lanketa. Azken batean, erasotzaileak eta haien babesleak dira erasoen arduradun bakarrak.

Egoera hau irauli beharra daukagu, gure biziak daude jokoan. Ahaldundu gaitezen eta joka dezagun irmo: zaindu dezagun elkar.

Bide batez, ohar honen bidez adierazi nahi dugu bat egiten dugula Euskal Herriko Mugimendu Feministaren lelo eta deialdiekin. Geuk ere aldarrikatzen dugu “Beldurra eta kontrolaren aurrean, Justizia Feminista”. Aurten, bereziki salatzekoa da Mugimendu Feministaren kriminalizazioa, bai eta emakume* eta sexu/generoko disidenteon borroken eta bizitzen gaineko kontrola ere. Helburua da instituzioen erantzukizuna azpimarratzea indarkeriaren iraupenean.

Azaroaren 25 honetan zein urteko gainontzeko egunetan, egin diezaiogun aurre indarkeria matxistari.

Eraldaketa gure esku dago!

2022-11-25 AEK

Urtarriletik aurrera, hainbat online ikastaro jarriko ditugu martxan. Tartean, C2 maila lantzeko ikastaroak. Baina, adi, abenduan ere aukera izango duzue C2ko azterketa prestatzeko.

Izan ere, C2 maila lantzeko Ikastaro laburra eskainiko dugu (25 ordu) eskainiko dugu.
ONLINE!
Abenduaren 5etik urtarrilaren 13ra
Egokia urtarrilean azterketaren bat dutenentzat (lan-poltsaren bat).
189 euro 

Matrikulazioa HEMEN. Azken eguna: azaroak 29
Oharra: Datuak bete eta ordaindu eta gero, e-postara kopia bat iritsiko zaizue eta balitekeela spametara joatea. Beraz, begiratu karpeta hori, mesedez. Edozein zalantza izanez gero, jarri harremanetan gurekin Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbidean.
informazioa: Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.

AEKtik deia luzatu nahi dizuegu euskaltzale guztiei Euskaraldira hurbil zaitezten, ariketa kolektibo horretan parte har dezazuen

Atrebentzia handiz, geure aurkezpen-txartelarekin osatuko dugu gogoeta honen hasiera. Hauxe duzue AEKren metodologiaren ardatza: hizkuntza, komunikaziorako tresna den neurrian, pertsonen artean jarduteko eta bizitzeko tresna ere bada. Hala, hizkuntza jakiteak ezinbestean dakar jende artean erabiltzeko gai izatea. Beraz, AEKn nahi dugu gurekin ikasten duen pertsonak euskara bere bizitzako edozein arlotan eta unetan erabiltzen ikas dezan; horretan oinarritzen da gure metodologia.

Iruditzen zaigu euskaltegiak beti izan direla euskararen normalizazioaren ametsezko egoeraren lagin bikaina: adin guztietako herritarrak aritzen dira euskararekiko atxikimendua lantzen, eta, batik bat, gaitasun egokia lortzen, euskara ezagutzeko ez ezik euskara erabiltzen ere jaki nahian. Motibazioak ekartzen ditu euskara ezagutzera; baina ezagutza ez da aski euskara erabiltzeko, ez: motibazioa eta gaitasun egokia ezinbestekoak dira, eta horretan trebatzen dira euskaltegietako ikasleak. Horri begira, ikasgelan erabilera erosorako baldintzak sortzen ditugu, eta euskaltegiko elkarreragina arigunetzat dugu, euskaraz lasai aritzeko gunea, Euskaraldiak ekarri duen izendapena aintzat hartuta.

Hori dela eta, betidanik ikasleak prestatu ditugu, baita animatu ere, euskara erabil dezaten ikasgelatik kanpo, bizitzako edozein arlotan eta unetan; beraz, egunotan, ikasleria gonbidatzen ari gara Euskaraldiaren ariketa praktikoan parte hartzera, izan daitezen ahobizi edo belarriprest. Ez hori bakarrik, AEKtik deia luzatu nahi dizuegu euskaltzale guztiei Euskaraldira hurbil zaitezten, ariketa kolektibo horretan parte har dezazuen.

Oso-oso garrantzitsua da askok izena ematea, eta Euskaraldiak iraungo duen egunetan ariketa buru-belarri gauzatzea, gerora ere ekimenaren bultzadak segida izan dezan. Azaroaren 18tik abenduaren 2ra, Euskal Herri osoan ahobiziak eta belarriprestak barra-barra azalduz gero, sekulako baldintza onak sortuko dira euskara lasaiago eta erosoago erabiltzeko, euskaltegietan egunerokoan bermatzen ahalegintzen garen moduan.

Dena den, jakinekoa den bezala, herritarren ahalegin soila ez da aski euskararen auzia bideratzeko, hori ere beharrezkoa bada ere; horregatik, ezinbestekoa da udaberrian, azken Korrikan, bizi izandako herri-gogoa berriro sumatzea, euskaltzaleon ilusioa beste kolpe handi batez berritzea edo, hastear dagoela, Euskaraldian herritarren engaiamendu erraldoia ikustea. Arestian genioen moduan, ekimenek eraikitzen dute hizkuntza baten komunitatea, eta nahitaezko ekintza dugu inguruan eragiteko ere.

Amaitzeko, aurreko esaldiari helduta, eragiteaz ari gara, bai; hori dela eta, adibidez, ariguneak ugaritzea oso garrantzitsua da, herritarrek erabilera-eremu berriak ezagut ditzaten, bertan saia daitezen euskara erabiltzen. Zer esanik ez, instituzioek rol garrantzitsua dute euskararen normalizazioan, herritarren engaiamenduari bide eman behar diotelako, eta guztiz ezinbestekoa delako Euskal Herri osoan euskararen erabilera bermatzeko baldintzak ziurtatzea, inork ez dezan inolako eragozpenik izan euskara baliatzeko. Finean, xedea Euskal Herri erosoa lortzea da.

Gure euskaltegietako eskoletan Euskaraldia lantzen ari gara. Gure ikasleak eta irakasleak Ahobizi ala Belarriprest izango dira eta gure euskaltegiak, ARIGUNE.

Animatu eta parte hartu ariketa sozialean!!

AEK ere Euskaraldiarekin bat!

Goiko argazkian, Zarauzko AEK-ko ikasleen erronketako batzuk aurtengo Euskaraldirako.

Jarraian, Oarsoaldeko AEK-ko lagunak, euskaltegian.

Elkarrek ARIAN irakurgai mailakatuen sailean bi liburu berri kaleratu ditu: Miren Agur Meaberen "Elurraren promesa" eta Andoni Tolosaren "Maleta bat igogailuan" .

Andoni AEkidea dugu, musika arloan ere aski ezaguna, eta orain idazle ere ezagutu dugu. Bejondeizula, Andoni!

Era berean, liburuaren trama interesgarria da oso, euskara ikasleentzat, batez ere, hasiera mailakoentzat: "Euskaltegian euskara ikasten hasi den Hector ikaslearen egunerokoa da liburua; ikasturte baten kronika"

Ezaguna den bezala, sail horretako liburuak euskara ikasleentzat sortutako irakurgaiak dira eta testuak, ilustrazioak eta ariketak uztartzen dituzte.

Asier Amondoren lekukoa jasota, Ane Elordi (Zornotza, 1991) izango da KORRIKAren arduradun nagusia. Hala erabaki zuen AEK-k azken Batzar Nagusian. Amondok berak AEKn jarraituko du, beste eginkizun batzuetan. Elordiren esanetan,«KORRIKA kolore, iritzi eta pentsamolde desberdin asko elkartzen dituen Euskal Herriko egitasmo bakarrenetakoa da, eta horren gidari izatea ohorea da».

KORRIKAren aurpegi berria kazetaritza lizentziaduna da, eta 2015etik dabil AEKn. Erakunde barruan lan andanatan ibili da Elordi: irakasle, barnetegietan, berbalagun egitasmoan, komunikazioan... baita KORRIKAn bertan ere. Besteak beste, 21. edizioan furgoneta kidea izan zen, eta 22.ean komunikazio taldeko kidea, beste zeregin batzuen artean.

Elordik dio alde batetik «poza» sentitzen duela, «lankideek, emandako konfiantzarengatik»; baina beste aldetik «bertigoa» ere sentitzen duela. Halaber, eta bera ordezkari nagusia izanagatik, lasterketa erraldoiaren antolakuntza sarearen garrantzia ere nabarmendu nahi izan du Elordik: «AEKide guztiok eta herritar asko barik, KORRIKA ez litzateke posible izango. Gu, azkenean, hautatu batzuk gara, eta horretan egoteko ohorea daukagu, baina guk bakarrik ez dugu ezer egingo».

Horretaz gain, koordinatzaile berriak KORRIKAren erronkak zeintzuk diren ere baditu argi: «ekimenaren eragina, poztasun hori, euskararen aldeko jarrera hori, ez daitezela 10 eguneko kontu hutsean geratu. Hau da, alde egotetik egitera pasatzea».

AEKren AIZU! aldizkariak egin dion elkarrizketan haren gogoeta gehiago eta Ane Elordi bera ere hobeto ezagutzeko aukera dago, hemen.

Ezagutzaren Unibertsalizazioari buruzko bigarren jardunaldiak antolatu dituzte Kontseiluak eta Jaurlaritzak elkarlanean. Hiru ardatz izango dituzte, herritar euskaldunak lortzeko bide nagusiak: hezkuntza arautua, hizkuntzaren transmisioa-sozializazioa, eta helduen euskalduntzea.

Gasteizko San Prudentzio fundazioan izango dira azaroaren 10ean eta 11n, eta Jauzirako Prest izena izango dute.

AEKren ordezkaritza bertan izango da eta, azaroaren 11n, Helduen euskalduntzearen mahai-inguruan,Artezkaritza Kontseiluko kide Aize Otañok hartuko du parte. Mahai-inguru horretan, gizarte ekimeneko euskaltegietako ordezkariek euskararen beharra sustatzeari begira egindako hausnarketaren ondorioak partekatuko dituzte.

Informazio gehiago eta izena-ematea www.kontseilua.eus webgunean (azaroaren 7ra arte).

AEK-n argi dugu : euskara ikasteko manera onena ikastaldi trinkoak egitea da. Euskaran murgiltzeko parada ematen du. Eeuskara ikasteaz gain, euskaraz bizitzeko parada.

Aurtengo lehen ikastaldia euskara hastapenetik ikasi nahi dutenentzat da, eta Baionako Gau Eskolan iraganen da azaroaren 28tik abenduaren 9ra. Euskarari lehen behako bat eman nahi dietenei edo Gau Eskoletan izena emateko berantegi ibili direnei zuzendua da, lehen hiru hilabeteetako nozioak ikasteko parada ematen baitzaie. Horrela, nahi izanez gero ikasleak urtarriletik goiti Gau Eskola bateko lehen urteko talde batean sartzeko behar beste nozio ezagutuko ditu.

Kurtsoak astelehenetik ostiralera izanen dira, bi astez, 9:00etatik 13:00tara.

Prezioa : 200 euro + 22 euro (kidetza)
Maila : Hastapena /iniziazioa
Izen emateak azaroaren 11 arte

Xehetasun gehiagorentzat, harremanetan jar zaitez gurekin

AEK : Marengo karrika, 22 – 64100 Baiona

05.59.25.76.09   /  06 03 20 50 10  Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.

AEK, euskara ikasteko bidelagun onena!

Zonifikazioa gainditzeko garaia da; Nafarroa bat egiteko garaia da. Ia hiru hamarkada pasa dira euskararen legeak lurraldea hirutan zatitu zuenetik, eta bada garaia egoera bidegabe honekin bukatzeko, Nafarroa garaia bat izan dadin. Euskararekin bat egiteko garaia da. Eta horretara dator Errigora!

Kanpaina honetan saskiak eskatzea bada bat egiteko modu bat. Zonifikazioaren afera ez baita nafarren arazoa, euskararena baizik, eta datozen hilabeteak erabakiorrak izan daitezke. Kanpaina honek eskaintzen du, elkartasuna adieraztetik harago, Nafarroa hegoalde eta erdialdeko euskalgintzari baliabide ekonomikoak emateko bidea, baita haien eguneroko batailetan gainontzeko euskaltzaleen babesa eta arnasa sentitzekoa ere.

Azken urteetan egin dugun bezala, hiru saski izanen ditugu kanpaina honetan: saski beltza (55€), Errigoraren saski klasikoa, saski berdea (65€), ekologikoa, eta saski zuria (75€), berezia. Gainera, iaz egin genuen gisan, saski bakoitzean egutegi txukun bat oparituko da.

Eskatu zure saskia/k azaroaren 10era arte eta egin bat euskararekin!

2022ko urriaren 19 honetan, AEK-k prentsa agerraldi bat antolatu du Baionako AEK Gau Eskolako liburutegian.
Agerraldi honen helburua da Ipar Euskal Herriko AEK-ren egoera aurkeztea eta helduen euskalduntzeko baliabide duinen beharra agerian ematea. Hizlariak izan dira: Ihintz Oliden (AEK-ko koordinatzailea), Amaia Beyrie (AEK-ko Zuzendaritzako kidea), Xabi Gartzia (AEK-ko Artezkaritzako kidea) eta Sébastien Castet (Euskal Konfederazioko langilea).

Ikasturte berri honetan, orotara 1 600 ikaslek eman dute izena AEK-n. Euskara ikasteko baldintza ahal bezain onak eskaintzeko, etengabeko hobekuntza eta garapena izan dugu betidanik helburu. Ikaslegoa eta langilegoa emendatuz doaz, kurtso eskaintza gero eta anitzagoa dugu eta formakuntza erakundeei eskatzen zaizkien kalitate berme ziurtagiriak lortu ditugu. Halaber, AEK helduen euskalduntzearen ildoko erronka handiei buru egiteko prest da.

Alabaina, hizkuntza politikaren berme diren instituzioetatik engaiamendu eta apustu eskasak helduen euskalduntzeak merezi duen garapena trabatzen du.  Kurtsoen doakotasuna ahalbide lezakeen bekarik ez da gaur egun Ipar Euskal Herrian eta gure funtzionamenduaren segurtatzeko diru-laguntza publiko egokirik ez dugu eskuratzen.

AEK-ko langileek egoera hau salatu nahi dugu, jasaten ahal dugunaren mugara helduak baikira.

Horretarako, Ipar Euskal Herriko instituzioei dei egiten diegu Helduen Euskalduntze Arloari medio sendoak eman diezazkioten.

Nafarroako euskaldunen hizkuntz eskubideak aldarrikatuko ditu Hordago! herri ekimenak, urriaren 22an, Tuteran egingo den manifestazioan. AEK-k bat egiten du ekimen honekin eta bertan izanen da.

Euskararen aldeko eta Nafarroa osoan askatasunez bizitzeko aukerak oztopatzen dituen zonifikazioaren aurkako manifestazioa izango da. Hala, Nafarroan “ez euskaldun” izendaturiko eremuetako herritarrei dei egin diete, bereziki Erriberakoei, manifestazioan parte har dezaten. Iazko azaroan aurkeztu zuten Nafarroako Cortes herrian Hordago! herri ekimena. Zonifikazioari aurre egitea du helburu , eta arrazoi linguistikoengatik Nafarroan inolako bereizkeriarik gabe bizi ahal izatea aldarrikatzen du. Horrela jaso zuten orduan Corteseko Adierazpena izeneko idatzian. Erriberako hainbat herritarrek bat egin dute adierazpenarekin, eta Tuterako manifestazioan “euskara Nafarroa osoko hizkuntza dela” ozen aldarrikatzeko deia egin dute. Manifestazioa 17:30ean hasiko da, Tuterako Plaza Berrian.

Aste honetan, AEKn abian jarri dira 2023-2024 ikasturteko ikastaroak, eta, oro har, oraindik ere izena eman daiteke urrian zehar. AEK-k aukera eskaintzen du 100 euskaltegi baino gehiagotan.

Hauek dira AEKn euskara ikasteko aukerak:

• Euskaltegietan, aurrez aurreko taldeak: ohiko euskalduntzea eta mailak egiaztatzeko ikastaroak:Hasiera maila, A1, A2, B1, B2, C1 eta C2.

• Autoikaskuntza euskaltegian.

• Eredu konbinatua, aurrez aurreko eskolak eta autoikaskuntza uztartuta.

• Online ikastaroak.

• Foruko barnetegia, Urdaibaiko biosfera-erreserban, urte osoan zabalik.

Beraz, etxeko eta lagun arteko harremanak euskaraz izateko, lan-egoera hobetzeko, bilatzen ari diren euskara-maila ezagutzeko, eta abar, herritarrek AEKn aukera ugari dute.

AEK eta euskara hurbil, zu urrun heltzeko.

AEKren Praktikatu zerbitzuak abian du 2022-2023 ikasturterako kanpaina, Praktikatu euskara gurekin leloa lagun. Hala, urriaren aurreneko egunetan hasiko dira martxan, Euskal Herriko leku askotan, berbalagun, mintzakide eta mintzalagun taldeak, lagun giroan elkartu eta euskaraz aurrez aurre jarduteko. Online saioak, berriz, azaroan hasiko dira. Dagoeneko dohain eman daiteke izena talde mota guztietarako, euskaltegietan, udal euskara zerbitzuetan zein Praktikaturen www.praktikatu.eus atarian.

Praktikatu hazten ari den egitasmoa da: gaur egun, Euskal Herriko 76 herritan antolatzen ditu mintzapraktika saioak, eta 300 ekintzatik gora burutzen dira urtean, tartean, mintzodromoak. Ikasturte honetan kopuru horiek handitu egingo dira, lehendik egiten direnez gain, hiru proiektu berri jarriko direlako martxan: Zangozan (Nafarroa), Igorren (Bizkaia) eta Pasaian (Gipuzkoa). Hitanoa lantzeko Hiketalagun proiektuak, berriz, jarraipena izango du Durangaldean (Bizkaia), Arriben (Nafarroa) eta Urola Kostan (Gipuzkoa); eta elkarri hika hitz egiteko talde berrien sorrera ere sustatuko da, besteak beste, Usurbilen eta Lea-Artibain. Familientzako Gurasolagun taldeetan ere segituko dute jolasak, txangoak eta tailerrak egiten, helduek eta haurrek euskaraz batera aritzeko aukera izan dezaten.

Aurtengo udazkenean, gainera, Euskaraldiaren hirugarren edizioaren atarian gauden honetan, Praktikaturen proiektuek esanahi berezia hartuko dute, mintzataldeak euskaraz bizitzeko aukera ematen duten arigune naturalak baitira, hau da, uneoro euskaraz hitz egiteko aukera bermatzen duten guneak. Izan ere, ohiko taldeez gain, eta euskararen transmisioa sendotzeari begira, Praktikatu egitasmoak euskarazko harrema sare berriak sustatzen ditu ekintza osagarrien bidez, hala nola, asteburuko egonaldiak, barnetegi ibiltariak edota zaletasunen (natura, kirola eta kultura) araberako interes taldeak antolatuta. Ondorioz, bereziki azpimarratzekoa da horietan guztietan parte hartzen duten mintzalagunen, mintzakideen, berbalagunen eta bidelagunen ahalegina eta euskararen transmisioari egiten dioten ekarpena.

Fermin Muguruzari eta Ane Lindaneri elkarrizketak: Begoñako hilobiek ezkutatzen zutena; Europan barrena bizikletan; gerrako erbestearen oroitzapenak; Euskaraldia...

Udako oporren osteko lehen alea hemen da!!