Hasiera

AEKn euskara ikasteko aukerak dituzu:

• Aurrez aurreko taldeak: ohiko euskalduntzea eta mailak egiaztatzeko ikastaroak.

• Autoikaskuntza euskaltegian.

• Eredu konbinatua, aurrez aurrekoak eta autoikaskuntza uztartuta.

• Online-ikastaroak.

• Kolektibo zehatzei begirako xedeen araberako eskaintza.

• Foruko barnetegia, urte osoan zabalik, Urdaibaiko biosfera-erreserban

AEK zugandik hurbil dago, zure etxetik oso gertu. Euskal Herri osoan aurkitu ahal gaituzu, herrialde guztietan zabaldutako ehun euskaltegitan, ikusi non gauden. Era berean, euskaltegira etortzerik ez baduzu, online-ikastaroak eskaintzen dizkizugu. Gainera, zu zauden tokira ere joaten gara, enpresetan nahiz ikastetxeetan, adibidez, ikastaroak ematen ditugulako. Azkenik, Foruko barnetegia urte osoan zabalik dugu.

B2 maila egiaztatuz gero, erabiltzaile aurreratua izango zara: “Lagun eta lankideekin, baita jatorrizko hiztunekin ere, ohiko elkarrizketak jariotasunez izan: argibideak eman, iritzia eskatu eta adierazi, zure ikuspegia arrazoitu, etab”.

Maila horretara iristeko, ikastaroetan parte hartuz, eman behar diren ikastorduak 800-1.100 dira.

Hau da beraz, euskalduntze ikastaroak antolatzeko emango dugun denboraren estimazioa gure mailaketan kokatuta:

A0tik A1era: 100-150 ordu

A1etik A2ra: 200-250 ordu

A2tik B1era: 200-300 ordu

B1etik B2ra: 300-400 ordu

B2tik C1era: 300-400 ordu

C1etik C2ra: 200 ordu

Ohar garrantzitsuak:

• Hau estimazioa da, ikastaro formaletan parte hartuz, errendimendu normalaren bidez pertsona batek egin beharko lituzkeen ikastorduak.

• Ez da euskara ikasteko behar den denbora berez, gure ikastaroetan egingo diren ikastorduak baino, ikastaroen bidez, gure ustez, behar den maila lortzekoak.

• Ordu kopuru horietan eragina duten aldagai asko egon daitezke: pertsonaren errendimendua, interesa eta motibazioa; ikastaroen arteko denbora-tartea, ingurua... Ez da beraz zenbaki zehatza.

Prezioa ikastaroaren araberakoa da. Adibidez, aurrez-aurreko ikastaro batean, euskaltegian, urritik ekainera, astean 8 orduz, prezioa 600 euro ingurukoa da. Hala ere, ikastaroek ordu gutxiago edo gehiago izan ditzateke, trinkoak, autoikaskuntza, online, Foruko barnetegia...

Prezio zehatza jakin nahi baduzu, galdetu hurbilen daukazun AEKren euskaltegian.

Horretaz gain, gogoan izan dirulaguntzak daudela.

Eusko Jaurlaritzaren dirulaguntzak
Nafarroako Gobernuaren dirulaguntzak
Arabako Foru Aldundiaren laguntza-bonuak.
Udal askok ematen dituzten dirulaguntzak.
Langabeentzako doako euskara-eskolak, Lanbideren bidez.
Administrazioen hainbat sailetan dauden hitzarmenak.
Enpresa ugarik euren langileei ematen dizkieten laguntzak
ENPRESAK hobaria jasotzeko aukera, FUNDAEren bitartez.

Ohar garrantzitsua: galdetu euskaltegian, dirulaguntzen zehaztapenak jasotzeko.

Informazio gehiago: https://www.aek.eus/eu/dirulaguntzak

Egiaztatze azterketak EAEn
-A1 eta A2 mailetako probak euskaltegietan bertan egiten dira.
-B1, B2, C1 eta C2 mailak euskaltegietan matrikulatutako ikasleentzako bi deialdietako batean egiaztatzen ari dira.
-B1, B2, C1 eta C2 mailetan, deialdi irekiak izan dira azken urteetan.

Egiaztatze azterketak Nafarroan
-EGA azterketarako deialdi bat egiten du Nafarroako Gobernuak.
-B1, B2 eta C1 mailak Hizkuntza Eskola Ofizialetan egiaztatu ahal dira, deialdi irekian.

Ordutegi malguak ditugu! Goizetik iluntzera hainbat aukera aurkituko duzue, eta txandaka ere etor zaitezke.

Urritik ekainera, astean 4, 6, 8 eta 10 orduko eskolak eskaintzen ditugu eta hainbat euskaltegitan 4 edo 5 orduko ikastaro trinkoak goizez edo arratsaldez.
AEKren euskaltegietan informazio zehatzagoa emango dizute ikastaro eta ordutegiei buruz.

AEKn matrikulatzeko zein informazioa eskuratzeko errazena eta praktikoena da zuzenean euskaltegira jotzea eta zure datuekin matrikula fitxa betetzea. Hala ere, telefonoz eta galdetegi hau betez ere egin daiteke. Nahi baduzu, hurbildu, deitu edo bidali mezua hurbilen duzun euskaltegira, ikusi.

AEKren metodologia ardatza hauxe da: hizkuntza komunikaziorako tresna den neurrian, pertsonen artean jardun eta bizitzeko tresna ere bada. Hala, hizkuntza jakiteak ezinbestean dakar jende artean erabiltzeko gai izatea. Beraz, gurekin ikasten duen pertsonak euskara bere bizitzako edozein arlo eta unetan erabiltzen ikastea nahi dugu AEKn, eta horretan oinarritzen da gure metodologia.

Eguneroko bizimodurako euskara.

• Lehen egunetik mintzatzeko euskara

• Maite dituzunekin bizitzeko euskara

• Kaleko harremanetarako euskara

• Kulturaz gozatzeko euskara

• Erabilera formalerako euskara

• Euskara-maila egiaztatzeko euskara

• Lanean erabiltzeko euskara

• Goi-mailako euskara teknikoa

Sei dira helduen euskalduntzearen mailak, Europako Hizkuntzen Erreferentzia Markoaren arabera.

Hizkuntzen Europako Marko Bateratuak erreferentziazko 6 maila komun (A1, A2, B1, B2, C1 eta C2) ezarri ditu hizkuntzaren ezagutza aitortzeko.

Euskara-maila ebaluatzen duten hizkuntza-ziurtagiriek 4 trebetasunen ezagutza egiaztatzen dute: entzumena, irakurmena, idazmena eta mintzamena. Horiek ziurtatzeko, erakunde bakoitzak bere ziurtagiria du.

Ondorengo taulan aztertu daiteke euskararen ezagutza egiaztagirien baliokidetzak:

HABEk homologatutako ikastaroak 16 urtetik gorakoentzat dira.

Urtero, 50.000 inguru lagun aritzen dira Euskal Herriko euskaltegietan nahiz munduko hainbat txokotan.

Ikerketek diote, azken hamarkadetan, euskarak 300.000 hiztun berri irabazi dituela; horko heren bat, 100.000 lagun, euskaltegietatik atera da.

Herritar anonimo asko euskara ikasten ari da, baita ikasi ere. Gazteak, helduak, adinekoak, gurasoak, aiton-amonak, dendariak, unibertsitateko ikasleak, irakasleak, erizainak, mota guztietako langileak, alegia.

Gure jendarteak euskaldun anonimo asko irabazi ditu azken urteotan, eta etengabe hazten jarraitzen du.

Adinari dagokionez, batezbestekoa, 40 urtekoa da eta ikasleen %65 emakumeak dira.

Bestalde, hainbat arlotan ezagunak diren pertsonek ere euskaltegi batean ikasi dute euskara, jende askok ez dakien arren. Egunero, hedabideetan, azaltzen diren euskaldun askok euskaltegi batean ikasi dute. Esate baterako, hona hemen, zerrenda labur bat: Itziar Ituño aktorea, Fermin Muguruza musikaria, Juan Jose Ibarretxe lehendakari ohia, Reyes Ilintxeta kazetaria, Toti Martinez de Lezea idazlea, Yoli Pascualena abeslaria, Dani Alvarez kazetaria.

AEK Euskal Herri osoan aritzen da. Xede du Euskal Herriko biztanle guztiek euskara ezagutzea, eta herritarrek egunerokoan euskara normaltasunez erabiltzea. Horretarako, euskararen normalizaziorako eremu guztietan aritzen da: ezagutzan, erabileran eta sustapenean. KORRIKA ere AEK-k antolatzen du.