Udako ibiltariak pandemia aurreko erritmoa hartu du, zorionez, eta, dagoeneko, 2022ko datak zehaztuta ditugu:
Oinez. Uztailaren 16tik 31ra.
Bizikletaz. Abuztuaren 1etik 15era.
Prezioak, ibilbideak eta izena ematea > https://praktikatu.eus/ibiltaria
02
Mar
Mar
Martxoko alea labetik atera berri
Martxoko AIZU! kalean! Idurre Eskisabeli eta Julen Portillori elkarrizketak; musika aretoak pandemia ostean; Gomiztegiko artzain eskola; Italo Calvino labur-labur...
Liburu-denda eta kioskoetan eskuragai dagoeneko! Eta AEK-ko ikasleek, euskaltegian, doan!
01
Mar
Mar
Union Tutera taldeko jokalariak euskaltegian
Ez ohiko futbol taldea dugu Tuterakoa. AIZU! aldizkarian sakonki jaso genuen moduan, duela bi urte kirol talde herrikoia sortu zen Erriberan. Kirola oinarri hartuta, euskararen normalizazioa bultzatu nahi dute Ebro ibaiaren lurretan, baita genero berdintasuna, sexu aniztasuna, memoria historikoa eta kultur inklusioa ere. Mutilen futbol talde eta nesken areto futbol talde banarekin egin dute salto zelaira.
AEK ere taldearen sustatzaileetako bat izan da hasieratik (AEKren logoa ageri da elastikoetan), eta elkarlan horren barruan, hainbat jokalari euskara ikasten hasi dira. Argazkian dituzue, Tuteran, AEK-ko Arrigarai euskaltegian.
25
Feb
Feb
AEKren XII. Didaktika Topaketa Donostian
100 bat AEKide elkartu dira gaur, otsailak 25, AEKren XII. Didaktika Topaketan, Gipuzkoako Bazkundean.
AEKren euskaltegi eta irakasle askok 40 urte baino gehiago daramatzatenez euskara irakasten, beren esperientziak entzun eta partekatuko dituzte. Hala, Topaketa leku egokia izan da AEKren historia didaktikoa errepasatzeko eta irakasle gazteagoei ezagutarazteko.
Mintzodromo batek eta bi hitzaldik osatu dute Topaketako egitaraua
Batetik, dislexiaz aritu dira, DISLEGI (Gipuzkoako Dislexia Elkartea) kide Arantza Elgezabal Biainekin. Bestetik, euskalkiak ikastolen hezkuntz proiektuan izan dituzte hizpide, Ikastolen Elkarteko Inma Muñoarekin.
Bukatzeko, partaideek mintzodromoan parte hartu zuten, goizean ikusi eta entzundakoaren inguruan iritziak trukatzeko.
17
Feb
Feb
EUSKARAZ KOOP. S.ren Ohiko Batzar Orokorrerako deialdia
Euskaraz Koop. S.ren Estatutu Sozialetako 31. eta 32. artikuluetan xedatutakoari jarraituz, Artezkaritza Kontseiluak Euskaraz Koop. S.ren Ohiko Batzar Orokorrerako deialdia egin du.
DEIALDIA
Eguna 2023ko martxoaren 25a
Tokia: ETXARRI ARANATZeko Kultur Etxeko ARETO NAGUSIan
Ordua: Lehen deialdia 9:30ean.
Bigarren deialdia: 10:00etan
GAI ZERRENDA
Lehena.- Akta onartzeko bi bazkide eta batzarreko idazkaria izendatzea.
Bigarrena.- 2021-2022 ekitaldiko Kudeaketa, Urteko Kontuak eta Kudeaketa-txostena aztertzea, eta, hala balegokio, onartzea.
Hirugarrena.- 2021-2022 ekitaldiko emaitzak banatzea.
Laugarrena.- 2022-2023 ekitaldirako aurrekontu ekonomikoa aurkeztea.
Bosgarrena.- Barne-araubideko erreglamenduaren berrikusketa.
Seigarrena.- Gure egunerokoarekin lotutako zenbait gairen aurkezpena eta eztabaida (23 KORRIKA, Guztion etorkizuna eraikitzen-hausnarketa estrategikoa, AEK gure etxea-egituraren gaineko gogoeta prozesua, Ikasgu eta euskaltegien mapa, paperik gabekoak, ).
Zazpigarrena.- Ahalmena ematea Artezkaritza Kontseiluko lehendakariari eta idazkariari Batzar Nagusian hartu diren inskribatu beharreko erabakiak notarioaren aurrean eskritura publikoan jasotzeko, hala badagokio, eta Euskadiko Kooperatiben Erregistroan inskribatuak izan daitezen egin beharreko izapideak burutzeko.
Zortzigarrena.- Galde-eskeak.
OHARRA: Bazkideei jakinarazten zaie, Euskadiko kooperatiben legearen 24.4 eta 78.1c artikuluetan zedarritutakoarekin bat etorriz, bazkide guztiek dutela eskura kooperatibaren egoitza sozialean eta barne sarean kooperatibaren dokumentazio ekonomikoa eta Barne-araubideko erreglamenduaren berrikusketa proposamena, batzarrean landuko den gainerako dokumentazioarekin batera.
Lehendakaria
Aitziber Balantzategi Ibargoitia
Bilbon, 2023ko otsailaren 17an.
08
Feb
Feb
AEK-k XII. Didaktika Topaketa egingo du
AEKn XII. Didaktika Topaketa prestatzen ari gara larunbaterako (otsailak 25). Donostian elkartuko dira irakasleak, mahai inguru batean AEKren aspaldiko euskara eskolez aritzeko: AEKren euskaltegi eta irakasle askok 40 urte baino gehiago daramatzatenez euskara irakasten, beren esperientziak entzun eta partekatuko dituzte. Hala, Topaketa leku egokia izango da AEKren historia didaktikoa errepasatzeko eta irakasle gazteagoei ezagutarazteko.
Mintzodromo batek eta bi hitzaldik osatuko dute Topaketako egitaraua. Batetik, dislexiaz arituko dira, DISLEGI (Gipuzkoako Dislexia Elkartea) kide Arantza Elgezabal Biainekin. Bestetik, euskalkiak ikastolen hezkuntz proiektuan izango dituzte hizpide, Inma Muñoarekin (Ikastolen Elkartea)
Artxiboko irudia
02
Feb
Feb
Otsaileko AIZU! kalean!
Paul Urkijori eta Nerea Arrutiri elkarrizketak; Euskarazko Wikipedia, hazi eta hazi; Mendialdea Radio, Arabako Mendialdeko uhinak; txinatar kontuak gure artean; euskara pantailetan, labur-labur...
Segi azkar kiosko, euskaltegi edo liburu-dendara!!!
10
Jan
Jan
2023ko lehen alea, kalean!!
Urtarrileko AIZU! kalean! Uxue Apaolazari eta Mattin Lerissari elkarrizketak; Usansolo, udalerri izateko bidean; Ibon Oregi, aparretan bizitzen; Helsinkira bisita; txotx denboraldia ate joka...
Eta beste hainbat kontu interesgarri urtea ongi hasteko!
22
Dec
Dec
Gabon zoriontsuak!
Hizkuntza bat hitzekin osatzen da, baina ekimenek eraikitzen dute hizkuntza baten komunitatea.
Urte berrian ere lagunduko dizugu hiztun aktiboa izaten.
ZORIONAK ETA URTE BERRI ON!!
15
Dec
Dec
Nafarroa osoan, euskara ofiziala!
Nafarroako Euskararen Legearen 36. urteurrenean, euskara lurralde osoan ofiziala izatea eskatzeko kanpaina abiatu dugu Kontseiluko bazkideok.
Euskararen Nafar Kontseiluak onartutako adierazpenarekin bat egiteko hamaika eragileren atxikimendua jaso du. AEK-k ere, nola ez, bat egin du.
Kanpainaren inguruko informazio gehiago Kontseiluaren webgunean.
13
Dec
Dec
AEKren Bilboko eraikinak 25 urte bete ditu
Txakur kaleko eraikinean daude Kalderapeko kulturgunea, Lizardi euskaltegia eta AEKren hainbat zerbitzu
Urteurrena abenduaren 15ean ospatuko da, eta kultur ekitaldiak antolatuko dira 2023an zehar
Lizardi AEK-k 40. urtemuga ospatuko du 2023ko udazkenetik aurrera
Bilboko Zazpi Kaleetan AEKren hainbat zerbitzu, Lizardi euskaltegia eta Kalderapeko kulturgunea biltzen dituen eraikinaren 25. urtemuga ospatuko da abenduaren 15ean, Txakur kaleko 1. atariko egoitzan. Urteurren jaiaz gozatzeaz gain, kulturgunea dinamizatzea da asmoa, Bilboko AEK-k, eta AEK-k oro har, Bilbon izan behar duten erreferentzia eta ikusgarritasuna azpimarratzeko.
Arratsaldeko seietan hasiko da ospakizuna, DJ Elepuntoren musika emanaldiarekin, baina etenaldia egingo da 18:30ean, txupina bota eta erakina bertako balkoietatik bertsoz zoriontzeko. Arratsaldeko zazpietan topa egin eta mokadu txiki bat dastatu ostean, DJ Elepuntoren eskaintza 21:00 arte luzatuko da.
Jai honek 2023an zehar Kalderapeko kulturgunean eskainiko diren hainbat kultur ekitaldiren abiapuntua izan nahi du. Hala, Bilboko eta Zazpi Kaleetako beste eragile batzuekin elkarreragina bilatuko da, Zazpi Kaleetako euskarazko kultur giroa suspertzeko. Eta datorren urtean Lizardi AEK euskaltegiaren 40. urteurrena beteko denez, ikasguak hartuko du ondoren eginkizun horretarako lekukoa.
Txakur kaleko 1. atariko eraikinak 1997ko irailean hartu zuen bizia, birmoldaketa oso baten ostean. Kalderapeko (taberna, jatetxea eta kulturgunea) beheko solairuan duelarik, Lizardi AEK euskaltegiko ikasgelak dira euskara ikasleen eta irakasleen topaleku lehen hiru solairuetan. Eta azken bietan, Bilboko, Bizkaiko eta Euskal Herriko AEKren bulegoak daude, Ahize-AEK, Praktikatu, AIZU! eta Euskaratu zerbitzuekin batera.
07
Dec
Dec
AEK-KORRIKAko kideak, Durangoko Azokan
AEK-KORRIKAko kideok Durangoko Azokako hasiera ekitaldian egon gara.
Abenduaren 11ra arte, jarrai dezala musika, liburu eta soinuen eztanDAk!
01
Dec
Dec
AIZU! aldizkaria Durangoko Azokarako prest
Abenduko AIZU! kalean da. Gari eta Irantzu Lekueri elkarrizketak; Zumaiako flyscha; Durangoko 57. Azoka; Marcel Proust hitz gutxitan... Eta labean goxo-goxo ondutako beste hainbat kontu!
Harpidetza egin nahi? Sartu gure webgunean eta harrapatu aukera
01
Dec
Dec
Aurten ere, AIZU! aldizkaria Durangoko Azokan: 40+1!
472. zenbakian Gari abeslaria izango da protagonista nagusia, eta Hertzainaken kontzertuetarako 4 sarrera zozketatu ditugu harpidedunen artean
Azokan harpidetza egiten dutenek, prezio berezia ordaintzeaz gain, Zaldieroaren marrazkia duen poltsa jasoko dute opari
Zaldieroaren marrazkia daraman egutegia eskuratzeko aukera ere izango da Artekaleko 18.enean ipinitako standean
AEK-AIZU!k erakusmahaia jarriko du Durangoko Azokaren 57. edizioan. AEKren hainbat material didaktikoz gain, AIZU! aldizkariaren 472. zenbakia egongo da salgai bertan, inprentatik atera berria. Gari dakar azalean, musikari legazpiarra aukeratu baitugu elkarrizketa nagusiko protagonista izateko. Ez alferrik, berriki kaleratu baitu, Maldanbera taldearekin, bakarka egindako 27 urteko ibilbidea biltzen duen Zuzenean 2022 diskoa.
Halaber, Garik eman dio AIZU!ri zozketa egiteko aitzakia, aldizkariaren harpidedunen artean. Denon ahotan dagoenez, disko berria ez da Garik eskuartean duen proiektu bakarra: Hertzainak taldearen agurra izango diren kontzertuak ate joka dira eta, horren harira, AIZU!k bina sarrera zozkatuko ditu BECeko abenduaren 17ko eta Gasteizko urtarrilaren 6ko kontzertuetarako, bere harpidedun guztien artean. Beraz, Durangoko Azokan harpidetza egiteak ere zozketan parte hartzeko bide emango dio edonori, gainontzeko harpidedunekin batera. Harpidetza Azokan egiten duenak, gainera, prezio berezia ez ezik, oparia ere izango du oraingoan: Patxi Huarte Zaldieroak marrazturiko poltsa polit askoa. Harpidetzaz gain, aldizkariaren aurtengo ale solteak erosteko aukera ere egongo da Azokan bertan, AEK-AIZU!k Landako Gunean (Artekale, 18) jarriko duen standean. Ale soltea erosiz gero, erosleak poltsaren diseinu bera duen urteko egutegia jasoko du opari. Bestela, egutegia euro batean ere eskuratu ahal izango da.
Bestalde, Azokaz harago, aldizkaria bera ezagutarazteko kanpaina berezia ere egingo du AIZU!k abendu osoan zehar. Horretarako, Harrapatu aukera! lelopean, AIZU!ren ale bat (2023ko urtarrilekoa) doan eskuratzeko aukera eskainiko diogu hala nahi duen euskara ikasle orori. Horretarako, www.aizu.eus webgunera jo eta aldizkaria paperean edo PDF formatuan jasotzeko eskaria egin beharko da. Horrela, euskara ikasleentzako beren-beregi egindako aldizkaria ezagutzen ez duenak bertatik bertara ezagutu ahal izango du AIZU!ren eskaintza.
Iaz, Durangoko Azokan bertan, 0 zenbakia aurkeztu genuen tokian, ospatu genuen berrogeigarren urtemuga, eta aurten bueltan gatoz: 40+1!
25
Nov
Nov
Nafarroako euskara teknikariei prestakuntza AHIZEren eskutik
Ostegunean (azaroak 24) Nafarroako Euskara Teknikariei prestakuntza saioa eskaini zieten Maialen Otegi eta Maialen Begiristain AHIZEko aholkulariek.
Saio teoriko-praktikoa izan zen eta euskahaldunaz eta ahalduntzeaz aritu ondoren, arlo sozioekonomikoan euskara txertatzeko gakoez aritu ziren, teorian jasotakoa praktikara eraman eta lanerako baliagarria izango zaien dekalogoa osatu genuen.
23
Nov
Nov
Azaroak 25. Eraldaketa gure esku dago!
Urteak dira azaroaren 25a “Indarkeria Matxistaren Aurkako Eguna” izendatu zutenetik. Emakume* eta sexu/generoko disidenteon aurkako indarkeriak, ordea, ez du etenik izan epe horretan. Oraindik ere, indarkeriak aurpegi anitz dauzka, hamaika forma, eta gure eguneroko bizitzako eremu guztietan gertatzen da, hala nola lanean, eskoletan, korridoreetan, Whatsapp taldeetan...
Zoritxarrez, gure errealitatea ez da bestelakoa, ez gara bizi indarkeriarik gabeko eremu ideal batean. Jakin badakigu erasoak gertatzen direla. Badugu batzuen berri, eta aurre egiten saiatzen gara; beste askori, ordea, erasotuak bakarrik egin behar izaten die aurre.
Ahalduntzea, baina, ez da nahikoa: gizonek ulertu eta onartu behar dute pribilegiodunak direla, eta ezinbestekoa da pribilegio horiek baztertzeko lanketa. Azken batean, erasotzaileak eta haien babesleak dira erasoen arduradun bakarrak.
Egoera hau irauli beharra daukagu, gure biziak daude jokoan. Ahaldundu gaitezen eta joka dezagun irmo: zaindu dezagun elkar.
Bide batez, ohar honen bidez adierazi nahi dugu bat egiten dugula Euskal Herriko Mugimendu Feministaren lelo eta deialdiekin. Geuk ere aldarrikatzen dugu “Beldurra eta kontrolaren aurrean, Justizia Feminista”. Aurten, bereziki salatzekoa da Mugimendu Feministaren kriminalizazioa, bai eta emakume* eta sexu/generoko disidenteon borroken eta bizitzen gaineko kontrola ere. Helburua da instituzioen erantzukizuna azpimarratzea indarkeriaren iraupenean.
Azaroaren 25 honetan zein urteko gainontzeko egunetan, egin diezaiogun aurre indarkeria matxistari.
Eraldaketa gure esku dago!
2022-11-25 AEK
10
Nov
Nov
'Maleta bat igogailuan', Andoni Tolosa AEKidearen liburua
Elkarrek ARIAN irakurgai mailakatuen sailean bi liburu berri kaleratu ditu: Miren Agur Meaberen "Elurraren promesa" eta Andoni Tolosaren "Maleta bat igogailuan" .
Andoni AEkidea dugu, musika arloan ere aski ezaguna, eta orain idazle ere ezagutu dugu. Bejondeizula, Andoni!
Era berean, liburuaren trama interesgarria da oso, euskara ikasleentzat, batez ere, hasiera mailakoentzat: "Euskaltegian euskara ikasten hasi den Hector ikaslearen egunerokoa da liburua; ikasturte baten kronika"
Ezaguna den bezala, sail horretako liburuak euskara ikasleentzat sortutako irakurgaiak dira eta testuak, ilustrazioak eta ariketak uztartzen dituzte.
03
Nov
Nov
Azaroko AIZU! hemen da
Azaroko AIZU! kalean! Maddalen Arzallus Antiari eta KORRIKA arduradun berria Ane Elordiri elkarrizketak; Aurretiazko Borondateen Dokumentua; zaindu beharreko saguzarrak Araban; 'Luminiszenteak' proiektua; Cristobal Balentziaga hitz gutxitan...
Segi azkar kioskora, edo egin harpidedun www.aizu.eus-en!
28
Oct
Oct
Ezagutzaren Unibertsalizazioari buruzko bigarren jardunaldietan parte hartuko du AEK-k
Ezagutzaren Unibertsalizazioari buruzko bigarren jardunaldiak antolatu dituzte Kontseiluak eta Jaurlaritzak elkarlanean. Hiru ardatz izango dituzte, herritar euskaldunak lortzeko bide nagusiak: hezkuntza arautua, hizkuntzaren transmisioa-sozializazioa, eta helduen euskalduntzea.
Gasteizko San Prudentzio fundazioan izango dira azaroaren 10ean eta 11n, eta Jauzirako Prest izena izango dute.
AEKren ordezkaritza bertan izango da eta, azaroaren 11n, Helduen euskalduntzearen mahai-inguruan,Artezkaritza Kontseiluko kide Aize Otañok hartuko du parte. Mahai-inguru horretan, gizarte ekimeneko euskaltegietako ordezkariek euskararen beharra sustatzeari begira egindako hausnarketaren ondorioak partekatuko dituzte.
Informazio gehiago eta izena-ematea www.kontseilua.eus webgunean (azaroaren 7ra arte).
21
Oct
Oct
Bat egiteko garaia delako, hemen da Errigora!
Zonifikazioa gainditzeko garaia da; Nafarroa bat egiteko garaia da. Ia hiru hamarkada pasa dira euskararen legeak lurraldea hirutan zatitu zuenetik, eta bada garaia egoera bidegabe honekin bukatzeko, Nafarroa garaia bat izan dadin. Euskararekin bat egiteko garaia da. Eta horretara dator Errigora!
Kanpaina honetan saskiak eskatzea bada bat egiteko modu bat. Zonifikazioaren afera ez baita nafarren arazoa, euskararena baizik, eta datozen hilabeteak erabakiorrak izan daitezke. Kanpaina honek eskaintzen du, elkartasuna adieraztetik harago, Nafarroa hegoalde eta erdialdeko euskalgintzari baliabide ekonomikoak emateko bidea, baita haien eguneroko batailetan gainontzeko euskaltzaleen babesa eta arnasa sentitzekoa ere.
Azken urteetan egin dugun bezala, hiru saski izanen ditugu kanpaina honetan: saski beltza (55€), Errigoraren saski klasikoa, saski berdea (65€), ekologikoa, eta saski zuria (75€), berezia. Gainera, iaz egin genuen gisan, saski bakoitzean egutegi txukun bat oparituko da.
Eskatu zure saskia/k azaroaren 10era arte eta egin bat euskararekin!
14
Oct
Oct
Zonifikazioari Hordago! Euskararen aldeko manifestazioa, Tuteran
Nafarroako euskaldunen hizkuntz eskubideak aldarrikatuko ditu Hordago! herri ekimenak, urriaren 22an, Tuteran egingo den manifestazioan. AEK-k bat egiten du ekimen honekin eta bertan izanen da.
Euskararen aldeko eta Nafarroa osoan askatasunez bizitzeko aukerak oztopatzen dituen zonifikazioaren aurkako manifestazioa izango da. Hala, Nafarroan “ez euskaldun” izendaturiko eremuetako herritarrei dei egin diete, bereziki Erriberakoei, manifestazioan parte har dezaten. Iazko azaroan aurkeztu zuten Nafarroako Cortes herrian Hordago! herri ekimena. Zonifikazioari aurre egitea du helburu , eta arrazoi linguistikoengatik Nafarroan inolako bereizkeriarik gabe bizi ahal izatea aldarrikatzen du. Horrela jaso zuten orduan Corteseko Adierazpena izeneko idatzian. Erriberako hainbat herritarrek bat egin dute adierazpenarekin, eta Tuterako manifestazioan “euskara Nafarroa osoko hizkuntza dela” ozen aldarrikatzeko deia egin dute. Manifestazioa 17:30ean hasiko da, Tuterako Plaza Berrian.
Praktikatun, dena prest mintzapraktikari ekiteko
AEKren Praktikatu zerbitzuak abian du 2022-2023 ikasturterako kanpaina, Praktikatu euskara gurekin leloa lagun. Hala, urriaren aurreneko egunetan hasiko dira martxan, Euskal Herriko leku askotan, berbalagun, mintzakide eta mintzalagun taldeak, lagun giroan elkartu eta euskaraz aurrez aurre jarduteko. Online saioak, berriz, azaroan hasiko dira. Dagoeneko dohain eman daiteke izena talde mota guztietarako, euskaltegietan, udal euskara zerbitzuetan zein Praktikaturen www.praktikatu.eus atarian.
Praktikatu hazten ari den egitasmoa da: gaur egun, Euskal Herriko 76 herritan antolatzen ditu mintzapraktika saioak, eta 300 ekintzatik gora burutzen dira urtean, tartean, mintzodromoak. Ikasturte honetan kopuru horiek handitu egingo dira, lehendik egiten direnez gain, hiru proiektu berri jarriko direlako martxan: Zangozan (Nafarroa), Igorren (Bizkaia) eta Pasaian (Gipuzkoa). Hitanoa lantzeko Hiketalagun proiektuak, berriz, jarraipena izango du Durangaldean (Bizkaia), Arriben (Nafarroa) eta Urola Kostan (Gipuzkoa); eta elkarri hika hitz egiteko talde berrien sorrera ere sustatuko da, besteak beste, Usurbilen eta Lea-Artibain. Familientzako Gurasolagun taldeetan ere segituko dute jolasak, txangoak eta tailerrak egiten, helduek eta haurrek euskaraz batera aritzeko aukera izan dezaten.
Aurtengo udazkenean, gainera, Euskaraldiaren hirugarren edizioaren atarian gauden honetan, Praktikaturen proiektuek esanahi berezia hartuko dute, mintzataldeak euskaraz bizitzeko aukera ematen duten arigune naturalak baitira, hau da, uneoro euskaraz hitz egiteko aukera bermatzen duten guneak. Izan ere, ohiko taldeez gain, eta euskararen transmisioa sendotzeari begira, Praktikatu egitasmoak euskarazko harrema sare berriak sustatzen ditu ekintza osagarrien bidez, hala nola, asteburuko egonaldiak, barnetegi ibiltariak edota zaletasunen (natura, kirola eta kultura) araberako interes taldeak antolatuta. Ondorioz, bereziki azpimarratzekoa da horietan guztietan parte hartzen duten mintzalagunen, mintzakideen, berbalagunen eta bidelagunen ahalegina eta euskararen transmisioari egiten dioten ekarpena.
31
Aug
Aug
Iraila-urriko AIZU! aldizkaria kalean
Fermin Muguruzari eta Ane Lindaneri elkarrizketak: Begoñako hilobiek ezkutatzen zutena; Europan barrena bizikletan; gerrako erbestearen oroitzapenak; Euskaraldia...
Udako oporren osteko lehen alea hemen da!!
05
Jul
Jul
Hitzekin: denok euskara doan
Hitzekin izan zen 22. Korrikaren leloa: hitza eta ekintza. Hizkuntza bat hitzekin osatzen da, baina ekimenek eraikitzen dute hizkuntza baten komunitatea. Ekiteko ordua zela aldarrikatu nahi izan genuen; orain dela unea: euskara, hitzetik ekintzara. Aldekotasunetik konpromisora jo behar da, eta konpromisotik eragitera, erakunde orok urrats sendoagoak egin ditzaten jendartearen nahiei eta beharrei erantzuteko.
Hori dela eta, Korrikaren ingurumarian, esate baterako, dinamika bat abian jarri genuen doako ezagutzaren unibertsalizazioaren beharra ere jorratzeko. Gakoa oso argia da: euskara ikasi nahi duten herritarrek dohainik jarduteko parada izatea.
Azken batean, Euskal Herrian euskaraz biziko bagara, giltza izango da helduen artean euskaraz aritzeko gaitasun egokia zabaltzea, baita euskaltegietan zerbitzua doan jaso ahal izatea ere.
Zenbait ekimen proposatu ditugu dinamika abiatzearekin batera, helburua bistaratzeko, eta aurrerapausoak emateko eta erdiesteko. Batetik, lan-munduan, Denok euskara doan. Langileok prest izenekoa: AEK-Korrikatik elkarlan-bide bat landu dugu ELA nahiz LAB sindikatuekin, eta heldu den ikasturterako doako ikastaro laburrak antolatuko ditugu, hainbat lantokitan prest dauden langile-taldeekin. Berez, urtero eta Euskal Herriko lantoki askotan ezaguna den dinamika biderkatu nahi dugu ekimen horren bidez. Edonola ere, gehiagorengana iritsi nahi dugu, eta, batez ere, dinamikaren xedea bistaratzea da asmoa, ekintza praktiko horien bidez. Aurkezpenean langileek eurek adierazi zutenez, euskararen normalizazioa garatzeko ezinbesteko esparrua da lan-mundua, eta berau euskalduntzeko urrats zehatzak aldarrikatu zituzten: «Behar-beharrezkoa da langile guztiei euskara ezagutzeko bideak zabaltzea, horretarako denbora ziurtatzea eta zerbitzu hori doakoa izatea».
Bestalde, Donibane Garaziko adierazpena ere ezagutzera eman genuen. AEK ez ezik, beste euskaltegi askoren ordezkariak daude agiri horren atzean; hauek dira adierazpenaren sinatzaileak: Batuz Euskaltegi Elkartea (Altza-Urumea, Ulibarri, Urrats, Ilazki, Hitzez, Legazpi6, Herri Jakintza eta Udaberria), AEK, Juan Mateo Zabala euskaltegia, Gabriel Aresti euskaltegia, Errioxako IKA, Bai&by, Gotzon Garitanoaindia euskaltegia, Hegoalde euskaltegia, Bilbo Zaharra euskaltegia eta Maizpide.
Adierazpen horren bitartez, Euskal Herriko administrazio nagusiei dei egiten zaie, bertan hauxe jasota: «Unea da euskal herritar orori euskara ikasteko bidea doakoa izan dakion neurriak hartzeko. Proposamen eta bide ezberdinak ezagutzen ditugu. Elkar gaitezen eta osa dezagun, elkarlanean, eta berandu baino lehen, guztiok doan ikasteko bide-orria».
Egun hauetan, hain zuzen ere, bilera bana egingo dugu lurralde administratibo bakoitzeko erakundeekin (Ipar Euskal Herria, Nafarroa eta Euskal Autonomia Erkidegoa), proposamen horri heltzeko.
Berdintasunaren eta kohesioaren izenean, jendarteak euskal hiztun berriak behar ditu, eta justiziazkoa da euskara doan ezagutzeko eskubidea errealitate bihurtzea.
05
Jul
Jul
Udako AIZU! aldizkaria hemen da!!
Kalean da udako AIZU! Nahia Zubeldiari eta Fernando Alberdiri elkarrizketak; udan Euskal Herria ezagutzeko proposamenak... eta beste kontu ugari.
IBILTARIA 2022
20
Jun
Jun
Metro Bilbaoren hizkuntza irizpideak
Ostiralean, Metro Bilbaoren hizkuntza irizpideak aurkeztu ziren Bidebarrietako Liburutegian.
Ahizeko Mikel Urdangarinek saiotxo bat emango du Hizkuntza kudeaketaren inguruan
Ahizeko Mikel Urdangarinek saiotxo bat emango du Hizkuntza kudeaketaren inguruan
02
Jun
Jun
Mintzodromoa online
Ekainaren 10ean, E-uskaltegian mintzodromoa egino dute. Hainbat ikasle ari da AEKn -munduan zehar zein Euskal Herrian- online ikastaroetan- eta euskararen erabilera bultzatzeko asmoz, ikasleak eta euskaldunak elkartu dituzte, solasean jarri eta euskaraz aritzeko. Egunerokotasuna duten gaiak landuko dituzte. Nahi duen orok izena eman dezake.
Izena emateko azken eguna hilaren 7a izango da, hemen (aukeratu zein ordutegitan ahal edo nahi duzuen; bietan bada aukera biak jarri)