Dagoeneko eman daiteke izena AEKn udan euskara ikasteko. Kanpaina, Uda bizi, euskara eroso ikasten lemapean, uda osora zabalduko da, euskara ikasteko hainbat aukera eskainiz: barnetegia, euskaltegia, Euskal Herria bizikletaz zeharkatuz edo online; mintzataldeetan praktikatzeko parada ere izango da zenbait herritan. Izan ere, leloak berak dioen moduan, uda bizitzeko garaia dator, ahalik eta erosoena bizitzeko aroa, non alde batera geratzen diren ikasturteko betebeharrak eta opor-giroa nagusitzen den. Haatik, aisialdia ustiatzeko asmoa ere sortzen da batzuetan, “zerbait egiteko aprobetxatu” nahia.

Horretarako aukera zabala du AEKk udan: euskara ikasteko hainbat modu eroso jartzen ditu edonoren esku, ikasprozesua arina eta atsegina izan dadin. Argi adierazten dute hori kanpainako bi protagonistek; Victoria Zarco eta Oihane Alonso (bi seme-alabarekin) ez dira modelo hutsak, baizik eta AEKren barnetegietan udan euskara ikastea zer den ondotxo dakiten euskara-ikasleak.

Edozein barnetegi mota da aukera ederra euskararen ikasprozesuan aurrera egiteko, hainbat arrazoirengatik: ikaslea euskaraz bizi den ingurune batean murgiltzen da; eguneroko bizimodua euskaraz egiten du, goizetik gauera; ikasitakoa praktikan jartzen du etengabe; bere burua euskaraz egiteko gai ikusten du; euskaraz aritzeko ohitura sendotzen du; euskaraz berba eginez, harreman berriak egiten ditu... Gainera, mota askotako barnetegiak daude: familia-barnetegiak, euskalduntzekoak, azterketak prestatzekoak, xiberera ikastekoa, ibiltaria bizikletaz...

Bestalde, maiatzaren 12an zuzeneko web bidezko bi aurkezpen egingo ditu AEKko Udako Barnetegietako arduradun Alba Ayucar Castrok, familia-barnetegien inguruan, goizeko 10:00etan eta arratsaldeko 15:30ean. Ez dago izena eman beharrik, nahikoa da ordu horietako batean www.aek.eus atarian sartzea.

Barnetegiez gain, zenbait euskaltegiren ateak ere irekita egongo dira udan: barnetegira joaterik ez edo etxetik gertu egon nahi duten ikasleentzat, ikastaro trinkoak eskainiko ditu AEKk. Halaber, online ikastaroetan ere eman daiteke izena. Hala, datozen hilabeteetan, AEKk erakutsiko du uda eta euskara eroso ikastea bateragarriak direla.

Informazio guztia: https://www.aek.eus/eu/uda

Atsotitzak, bertsoak, musika eta giro paregabea lotzen dituen lehiaketa honen 31. edizioa apirilaren 25ean ospatuko da aurten. Urtero lez, edizio honek ere badu bere leloa: Igazko kabiak hutsik, ez da aurten txoririk. Bertsolari gonbidatuak, berriz, Aner Peritz eta Aissa Intxausti izango dira. Ikasi beharreko ehun errefrauak prest daude dagoeneko https://praktikatu.eus/esaerazaharrak atarian, eta parte hartu nahi duten taldeek (bi eta lau lagun artekoak) apirilaren 20ra bitartean eman ahalko dute izena, webgune horretan bertan edo HEMEN.

Liburuaren aurkezpena hilaren 17an
Lehenago, ordea, apirilaren 17an, lehiaketaren inguruko beste ekitaldi bat egongo da: Sopelako Esaera Zaharren Txapelketa: edo nola (ez) antolatu herri-ekintzak liburuaren aurkezpena Kurtzio kultur etxean. Izan ere, AEKk argitaratuko du, Uribe Kostako Mankomunitatearen dirulaguntzaz, lehiaketaren antolatzaile-taldeko kide Aitor Fernandez de Martikorenak idatzitako liburua. Lehiaketaren zertzeladak ditu oinarri, hiru atal nagusitan banatuta: testua, argazkiak eta material didaktikoa. Lehenengoa kontakizuna da, irakurleak jakin dezan nolako lana egin duten antolatzaileek lehiaketa aurrera eramateko. Bigarrenean, kartelen, oroigarrien, pegatinen, lehiakideen, bertsolarien... irudiak daude. Eta hirugarrenak lagungarri izan gura du euskara-irakasleentzat, atsotitzak eta/edo bertsoak lantzeko material egokia baita. Azken atal horretan, txapelketa hasi zenetik igarotako hiru hamarkadetan noizbait agertutako 206 atsotitz biltzen dira, azalpenez eta bertsoz horniturik.

Liburuaren egileak hitzaurrean azaldu duenez, asmoa ez da izan Esaera Zaharren Txapelketaren “kronika zehatza” egitea: “Nahikoa lan izan dugu edizioak egiten eta lehiaketa aurrera eramaten; hortaz, gutxitan apuntatu izan ditugu emaitzak eta sariak”. AEKk, ordea, omenalditxoa egin nahi izan dio liburua argitaratuz, ekimenak urtero-urtero, eta euskararen izenean, jende-kopuru polita batzen duelako. Zelan ez, txapelketak 30 edizio bete izanak ere badu zerikusia horretan. Uribe Kostako Mankomunitateak, bestalde, diruz lagundu du argitalpena, lehiaketak herrian euskararen presentzia indartzeko egiten duen ekarpenarengatik.

Euskara gara eta izango gara! Doako eskola apirilaren 22an AEKren euskaltegietan eta maiatzaren 21ean, ordea, mintzodromoak 65 herritan

AEKk 12. eguna: eta izango gara!  izeneko ekimena iragarri zuen euskararen aldeko lasterketararen balorazioan.“Korrikan parte hartu duten eragile guztiei konpromisoa eskatzen diegu, ekiteko engaiamendua. Lan horretan, besteak beste, ezinbestekoa da ordezkari politikoen ardura, haien babes juridiko eta politikoa. Askok eraman dute lekukoa Korrikan, baina ekintza sinboliko horretatik haragoko konpromisoa eskatzen diegu hemendik: Korrikaren harira egindako adierazpen ederrak ekimen bihur ditzatela, benetan susta dezaten Euskal Herri euskalduna”.

Eskaerak egiteaz batera, AEKk berak zer gehiago egin dezakeen adierazi zuen erakundeak agerraldian: “Beti esan dugu ez dela nahikoa Korrikan parte hartzea, hurrengo eguna ere garrantzitsua dela: benetako lanketa, konpromisoa, behin Korrika igarota dator. Asmo handiko helburuekin abiatzen dugu lasterketa, baina ekimena bera labur geratzen zaigu askotan, eta Korrikak 11 egun horietatik harago joan behar dugu. Hori dela-eta sortu dugu Korrikaren 12. eguna: Euskara gara eta izango gara! izeneko ekimena.

Horren baitan, apirilaren 22an ordubeteko eskola emango dugu, doan, gure 100 euskaltegietan. Hasiera-mailako klaseak izango dira, oraindik euskarara hurbildu ez direnentzat. Bestalde, maiatzaren 21ean inoiz baino euskara gehiago entzungo da gure artean! 65 mintzodromo antolatuko ditugu egun horretarako, Euskal Herriaren luze-zabalean. Azken batean, horrela lortuko dugu helburua: ikasiz eta praktikatuz.

Informazioa guztia: www.korrika.eus/etaizangogara eta AEKren euskaltegietan 

Izen-emateak: www.korrika.eus/12eguna eta AEKren euskaltegietan

Zapalkuntza sistemen aurrean: antolakuntza eta borroka.

Hori da EHko Mugimendu Feministak 2026ko martxoaren 8rako aukeratu duen leloa. Asko dira azken garaiotan munduan zein Euskal Herrian, emakumeon* eskubideen aurka izan diren erasoak. Eskumaren gorakada begien aurrean ikusten ari gara, eta bazterretan kokarazi gaituztenon aurkako erasoak areagotu egin dira, bortitz.

Baina ez gara despistatuko, badakigu nora eraman nahi gaituzten, zertara kondenatu nahi gaituzten, eta ez gaude prest. Mundua bestelakoa izan daiteke, gure ahizpen urteetako borroka eta antolakuntzari esker begien aurrean izan dugu, eta ez dugu galtzen utziko. Feminismotik egingo dugu guztion onerako izango den mundua, zapalkuntza sistema orori aurre egingo dion herria.

Martxoaren 8an berriro ere kalera aterako gara, eta beste mundu horren aldeko borrokan ez dugula etsiko oihukatuko dugu.
Feminismoak egiten gaitu herri, eta feminismoak egingo gaitu aske.

AEKkideok ere batu gaitezen beste mundu horren aldeko aldarrira, batu gaitezen EH feministaren aldeko borrokara.