Euskaraldia (6)
Aza
Euskal Herri erosoa, ahobiziz eta belarriprestez betea
AEKtik deia luzatu nahi dizuegu euskaltzale guztiei Euskaraldira hurbil zaitezten, ariketa kolektibo horretan parte har dezazuen
Atrebentzia handiz, geure aurkezpen-txartelarekin osatuko dugu gogoeta honen hasiera. Hauxe duzue AEKren metodologiaren ardatza: hizkuntza, komunikaziorako tresna den neurrian, pertsonen artean jarduteko eta bizitzeko tresna ere bada. Hala, hizkuntza jakiteak ezinbestean dakar jende artean erabiltzeko gai izatea. Beraz, AEKn nahi dugu gurekin ikasten duen pertsonak euskara bere bizitzako edozein arlotan eta unetan erabiltzen ikas dezan; horretan oinarritzen da gure metodologia.
Iruditzen zaigu euskaltegiak beti izan direla euskararen normalizazioaren ametsezko egoeraren lagin bikaina: adin guztietako herritarrak aritzen dira euskararekiko atxikimendua lantzen, eta, batik bat, gaitasun egokia lortzen, euskara ezagutzeko ez ezik euskara erabiltzen ere jaki nahian. Motibazioak ekartzen ditu euskara ezagutzera; baina ezagutza ez da aski euskara erabiltzeko, ez: motibazioa eta gaitasun egokia ezinbestekoak dira, eta horretan trebatzen dira euskaltegietako ikasleak. Horri begira, ikasgelan erabilera erosorako baldintzak sortzen ditugu, eta euskaltegiko elkarreragina arigunetzat dugu, euskaraz lasai aritzeko gunea, Euskaraldiak ekarri duen izendapena aintzat hartuta.
Hori dela eta, betidanik ikasleak prestatu ditugu, baita animatu ere, euskara erabil dezaten ikasgelatik kanpo, bizitzako edozein arlotan eta unetan; beraz, egunotan, ikasleria gonbidatzen ari gara Euskaraldiaren ariketa praktikoan parte hartzera, izan daitezen ahobizi edo belarriprest. Ez hori bakarrik, AEKtik deia luzatu nahi dizuegu euskaltzale guztiei Euskaraldira hurbil zaitezten, ariketa kolektibo horretan parte har dezazuen.
Oso-oso garrantzitsua da askok izena ematea, eta Euskaraldiak iraungo duen egunetan ariketa buru-belarri gauzatzea, gerora ere ekimenaren bultzadak segida izan dezan. Azaroaren 18tik abenduaren 2ra, Euskal Herri osoan ahobiziak eta belarriprestak barra-barra azalduz gero, sekulako baldintza onak sortuko dira euskara lasaiago eta erosoago erabiltzeko, euskaltegietan egunerokoan bermatzen ahalegintzen garen moduan.
Dena den, jakinekoa den bezala, herritarren ahalegin soila ez da aski euskararen auzia bideratzeko, hori ere beharrezkoa bada ere; horregatik, ezinbestekoa da udaberrian, azken Korrikan, bizi izandako herri-gogoa berriro sumatzea, euskaltzaleon ilusioa beste kolpe handi batez berritzea edo, hastear dagoela, Euskaraldian herritarren engaiamendu erraldoia ikustea. Arestian genioen moduan, ekimenek eraikitzen dute hizkuntza baten komunitatea, eta nahitaezko ekintza dugu inguruan eragiteko ere.
Amaitzeko, aurreko esaldiari helduta, eragiteaz ari gara, bai; hori dela eta, adibidez, ariguneak ugaritzea oso garrantzitsua da, herritarrek erabilera-eremu berriak ezagut ditzaten, bertan saia daitezen euskara erabiltzen. Zer esanik ez, instituzioek rol garrantzitsua dute euskararen normalizazioan, herritarren engaiamenduari bide eman behar diotelako, eta guztiz ezinbestekoa delako Euskal Herri osoan euskararen erabilera bermatzeko baldintzak ziurtatzea, inork ez dezan inolako eragozpenik izan euskara baliatzeko. Finean, xedea Euskal Herri erosoa lortzea da.
Aza
AEKn, Euskaraldirako prest!!
Gure euskaltegietako eskoletan Euskaraldia lantzen ari gara. Gure ikasleak eta irakasleak Ahobizi ala Belarriprest izango dira eta gure euskaltegiak, ARIGUNE.
Animatu eta parte hartu ariketa sozialean!!
AEK ere Euskaraldiarekin bat!
Goiko argazkian, Zarauzko AEK-ko ikasleen erronketako batzuk aurtengo Euskaraldirako.
Jarraian, Oarsoaldeko AEK-ko lagunak, euskaltegian.
Aza
Hainbat entitate Euskaraldiarekin bat!
Urr
AEK-ko euskaltegiak ere, ARIGUNE!
Euskaraz lasai aritzeko guneak dira Ariguneak. Ahobiziek eta Belarriprestek AEKren euskaltegietan ere aukera ederra izango dute euskaraz patxadaz praktikatzeko eta mintzatzeko. Ehunka arigunek eman dugu izena Euskaraldian eta non topatu jakin nahi izanez gero, HEMEN duzu begiratzeko aukera!
Euskaraldiaren informazio guztia euskaraldia.eus webgunean.
AEK ere arigune! AEK Euskaraldiarekin bat. Hitzez ekiteko garaia da.
Ira
Ahobizi ala belarriprest? Eman izena!
Zer da Euskaraldia? Euskara ulertzen duten hiztunen arteko hizkuntza ohiturak aldatzeko ariketa soziala da, jendartearen gune guztietara zabaldua eta denborari dagokionez mugatua. Aurten, azaroaren 18tik abenduaren 2ra egingo da ariketa.
Aurreko edizioan bezala, norbanako bezala eman daiteke izena; ahobizi edo belarriprest izanez. Ahobiziak euskaraz ulertzen duten guztiekin euskaraz egingo du. Euskaraz ulertzen ote duten ez dakienean lehen hitza, beti, euskaraz izango da; euskaraz ulertzen badu, euskaraz jarraituko du. Gakoa ahal den guztietan euskaraz egitea da. Belarriprestak, ordea, ulertzen duten guztiekin uneoro euskaraz hitz egingo ez dutenak dira. Gutxienekoa euskara ulertzea da. Hala ere, nahi eta ahal beste egin dezake euskaraz; baina besteek euskaraz egin diezaioten eskatuko du. Gakoa jokaeran dago eta ez gaitasunean.
Ira
AEKn Euskaraldia gara!
AEK-k ere Euskaraldiaren aurkezpenean parte hartu zuen, Bilbon. Lurdes Etxezarreta, Iñaki Urkijo eta Asier Amondo AEKideak hurbildu ziren ekitaldira.
Aurten ere AEK-ko euskaltegiak arigune izango dira, hau da, euskaraz lasai aritzeko eta uneoro euskaraz hitz egiteko aukera bermatzen duten guneak.
Bestalde, gogoan izan herritarren izen-ematea abian dela: ahobizi edo belarriprest gisa aritzeko.
Hitzez eta ekintzez betetako urtea izango dugu aurtengoa, 22. Korrikaren lekukoa jasota.