Abe
Euskararen erabilera areagotzeko konpromisoa hartu dute 24 enpresek ESKUARA zerbitzuarekin hitzarmena sinatuta
Lanabes egitasmoaren baitan kokatzen da Eskuara egitasmoa, eta Arabako Enpresen XI. Foroan egin dute sinadura ekitaldia. Enpresen foroan ikasleen praktikaldien inguruko mahai ingurua egin dute, eta bertan izan dira Lanabesek banatzen dituen Euskarazko Lanbide Heziketa Duala sarietako bi saridunak. AEKren hizkuntza aholkularitza Ahizek ematen du zerbitzua.
Arabako enpresetan euskara erabilera areagotzeko konpromisoa hartu dute lurraldeko 24 enpresek Eskuara zerbitzuarekin hitzarmena sinatuta. Lanabes egitasmoaren barruan kokatzen da zerbitzua, eta gaur goizean, abenduak 11, egin dute sinadura ekitaldia Arabako Enpresen XI. Foroan. Honako enpresa hauek sinatu dute hitzarmena Eskuara-rekin: Adigrafik, Aenkomer, Aiaraldeko Faktoria, Angostoko Kanpinga, Asafes, Ciudad Jardin, Ediren, Egibide LH, Eraiken LH, Eska Hiunday, Galemys, Gamarra LH, Grafik Sarea, Idarte LH, Irsearaba, Iza, Laudioalde LH, Mendizabala LH, Metaposta, Mutualia, Sartu Araba, Sirimiri, Tartekamedia eta Uriarte.
Araban arlo sozioekonomikoan euskararen erabilera areagotzeko egitasmoa da Lanabes, eta horren barruan kokatzen da Eskuara zerbitzua: doako aholkularitza ematen diete enpresei euskararen presentzia areagotzeko. 2023ko irailean aurkeztu zen, eta ordutik harremanak egiten aritu dira bertako aholkulariak 24 enpresa horiekin, eta zerbitzua eskaintzen: barne dokumentazioak euskaldundu dizkiete, langileen artean euskara erabiltzeko dinamikak abiatu, sare sozialetan euskara erabiltzen hasi, hizkuntza irizpideak zehaztu, ikasleen praktikaldian euskara erabiltzeko neurriak hartu... Proiektua Eusko Jaurlaritzak, Arabako Foru Aldundiak eta Gasteizko Udalak finantzatzen du, eta zerbitzua Ahize-AEK hizkuntza aholkularitzak ematen du.
Erakunde horietako guztietako kideak egon dira foroan. Ekitaldiari harrera egin diote Sonia Rodriguez Eusko Jaurlaritzako Hizkuntza Politika Sailburuordetzako Hizkuntza Ikerketa eta Koordinaziorako zuzendariak eta Saray Zarate Fernandez Arabako Foru Aldundiko Landa, Ekonomia Garapenaren eta Jasangarritasunaren saileko foru diputatuak. Eskuara zerbitzuarekin bat egin duten enpresei aitortza egin die, bestalde, Zarate Fernandezek eta Iñaki Gurtubai Artetxe Berdintasun, Euskara Eta Gobernantza Saileko foru diputatuak.
Eskuara zerbitzuarekin hitzarmena sinatu duten 24 enpresa horiena izan da goizeko argazki nagusietako bat, baina enpresa horiez gain, beste hainbat ere bertaratu dira Gasteizko Europa jauregira. Denetara 40 enpresetako ordezkariak gerturatu dira Arabako Enpresen XI. Forora. Euskara eta lan mundua uztartzen dituen topagunea da honakoa, eta bertan praktika onak aurkeztu dituzte: Iza igogailuak enpesako ordezkariak eta Mutualiakoak ere hitz egin dute. Lehenengoak hasi berriak dira euskararen erabilera areagotzeko lanketa egiten, eta bigarrenek urte asko daramatzate hizkuntzak kudeatzen. Biek ala biek nabarmendu dute euskararen erabilera areagotzearen beharra eta premia.
Baina lan mundua euskalduntzeko bidean, ezin ahaztu behar da Lanbide Heziketaren eta praktiken katebegia. Lanabes egitasmoak Euskarazko Lanbide Heziketa Duala sariak banatzen ditu, eta Arabako Enpresen XI. Foroan izan da aurtengo saridunetako bat: Ane Sesmilo Cruz nabarmendu ditu praktikaldia euskaraz egiteak ekarri dizkion onurak, eta horrek enpresari ematen dion balio erantsia. Izan ere, enpresetan hizkuntza aniztasuna kudeatzen denean besteengandik bereizteko balio dutela esan du, eta horrez gain, baita enpresa kokatzen den errealitatearekin egokitzea ere. Praktiketako ikasle sarituarekin batera igo dira taula gainera Joseba Koldo Gartzia Hontz Extrem-eko enpresaria, bertan praktikak egin zituen Mikel Nevado eta Xabier Mendiguren Ciudad Jardin ikastetxeko kidea.
Hitzartze horren ondoren, forora bertaratu diren 40 enpresetako ordezkariak taldetan banatu dira, eta taula gainean esandakoaren inguruko hausnarketa egin dute. Praktikaldiak euskaraz egiteko elkarlana sustatuz. Arabako Enpresen Foroa ere hori baita: lanketarako gune bat.
Jarrai dezagun Arabako arlo sozioekonomikoan euskara txertatzeko pausuak ematen!
Abe
Txorierriko 14 enpresek euskararekin konpromisoa hartu dute HABIA proiektuan
Txorierriko eskualdeko sektore guztietako 12 enpresak eta Lanbide Heziketako 2 ikastetxek euskararen eguneroko erabilera bultzatzeko konpromisoa hartu dute asteazken honetan, abenduak 4, HABIA egitasmoarekin bat eginez. Txorierri Zerbitzu Mankomunitateak,
Eusko Jaurlaritzaren eta Bizkaiko Foru Aldundiaren laguntzarekin, bultzatutako ekimena eskualdean sortu da "ekosistema egoki bat sortzeko", euskararen erabilera lan-eremuan "aktibatzeko", enpresei beren ibilbidea diseinatzen laguntzeko eta konpromiso horretara enpresa
berriak erakartzeko erronkarekin.
Proiektua asteazken honetan aurkeztu da Kultur Birikan (Derio), eta bertan izan dira Sonia Rodriguez Eusko Jaurlaritzako Hizkuntza Sailburuordetzako Hizkuntza Ikerketa eta Koordinazioko zuzendaria, Ainara Basurko Bizkaiko Foru Aldundiko Ekonomia Sustapeneko diputatua, Isaac Amezaga Bizkaiko Foru Aldundiko Euskara zuzendaria, Txorierriko alkateak eta Jon Ander Aurrekoetxea Txorierriko Zerbitzu Mankomunitateko presidentea, Ahize-AEKko teknikariak eta Lezamako alkatea. Azken horrek eskerrak eman dizkie enpresei euskararekiko erakutsitako konpromisoagatik, eta erakundeei ekimenari emandako laguntzagatik.
Ainara Basurko Ekonomia Sustatzeko diputatuak euskarak enpresa munduan duen "balio erantsia" azpimarratu du, eta "euskararen kudeaketa onak enpresen lehiakortasunean" eragiten duela ere adierazi du.
Esan bezala, HABIA sektore guztietako 12 enpresaren eta Lanbide Heziketako bi ikastetxeren atxikipenarekin sortu da. Azken hilabeteotan Ahize-AEK enpresako teknikariekin lanean aritu dira euskararekiko konpromisoa helburu zehatzetan gauzatzeko, lan-eremuan euskararen erabileran aurrera egin ahal izateko. "Enpresa bakoitzak bere ibilbidea eta abiadura ditu, eta enpresa bakoitzaren neurrira egindako jantziekin lan egingo da", azaldu dute arduradunek.
Proiektuak eguneroko lanean euskara erabiltzen duten enpresen sare bat sortu nahi du, jardunbide egokiak partekatzeko eta konpromiso horrekin bat egin nahi duten enpresa berrientzako eredu eta pizgarri izateko.
* Aberekin, Afesa, Azurmendi, Batz Zamudio, Biolan, Biwak, Lantegi Batuak, Lorra, Naguspea, Ondoan, Patxikoop, Skunkfunk, Nekazaritza Eskola eta Politeknika Txorierri.
Abe
AIZU!-AEK aurten ere Durangoko Azokan
Urtero bezala, AIZU!-AEK izango da euskal kulturaren hitzordurik garrantzitsuenean.
Landako guneko Goienkale 34ko postuan, AIZU! aldizkariaren urte osoko zenbaki guztiak salgai egongo dira; horiekin batera, harpidetza egiteko eskaintza berezia ere izango da: urte osokoa, ohi baino % 20 merkeago!
Gainera, Zaldieroaren 2025eko egutegi polita ere eskuratu ahal izango dute bertaratuek, euro baten truke.
Horrez gain, aldizkariak Ez da hain fazila denbora-pasa bildumaren bigarren edizioa kaleratu du; ia ehun orrialde dira, letra-zopak, hiztegi eroak, hitz gezidunak eta gurutzatuak, atsotitzak, sinonimoak, logika-jokoak, hitz-kateak, lauki lerroak... eta bestelako ariketa berri eta jostagarriz beteak, buruari euskaraz eragiteko.
Eta, nola ez, gure aldizkariaren azken alea ere eskuragarri egongo da, beti bezala euskara errazean idatzia. Oraingoan, Joseba Argiñano eta Ainhoa Jauregi izan dira elkarrizketatu nagusiak.
Korrikaren trixerta eskuratu nahi?
Berria egunkariaren eta AEKren arteko elkarlanari esker, Korrikaren 44. urteurrena ospatzeko kamiseta jarri dugu salgai. Berriaren postuan egongo da ikusgai, Goienkale 45-46 zenbakietan, zehazki. Gustatuz gero, eskaria egin Berriaren online dendan.
Hurbildu, beraz, Goienkalera!
Abe
Abenduko AIZU! kalean!
AEKko ikasleek doan jasoko dute aldizkaria euskaltegian, hilero bezala. Etxean jaso nahi? Bada, egin harpidetza: paperezkoa, digitala, edo papera+digitala.
Hilabete honetan ere askotariko edukiak euskaraz eta eroso irakurtzeko: Joseba Argiñanori eta Ainhoa Jauregiri elkarrizketak; Galdakaoko emakume dinamitarien oroitzapenak; Durangoko Azokan, Azokara eta mendira; Frankenstein gaztea hitz gutxitan; denborapasak eta beste kontu ugari...
On egin, irakurle!
Abe
Euskararen Eguneko Adierazpena: 2025a larrialditik indarraldirako bideari ekiteko urtea izango da
Euskararen Nazioarteko Egunaren atarian, Euskalgintzaren Kontseilua osatzen duten gizarte eragileen ordezkariak Martin Ugalde Kultur Parkean elkartu dira «Larrialditik indarraldira» izeneko Adierazpena irakurtzeko.
Azaroaren 9an, Kontseiluak, ELEN Europako Hizkuntza Berdintasunerako Sareak babestuta, euskara eta hiztun komunitatea larrialdi linguistikoan gaudela adierazi zuen. Larunbateko agerraldian, urrats bat aurrera egin eta larrialditik indarraldira bideari ekiteko beharra aldarrikatu dute Kontseiluko bazkideek. Horretarako, lehen eginkizuna euskararen normalizazio eta biziberritzea agenda politiko eta sozialaren ardatzean jartzea dela azaldu dute. Bestalde, iazko azaroaren 4ko manifestazioaren ondoren adierazi bezala, euskararen normalizazioa berriro norantza egokian jarriko duen akordio sozio-politikoa bideratzeko erantzukizunean berretsi dira, eta adierazi dute 2025a urte garrantzitsua izango dela euskararentzat eta euskal hiztun komunitatearentzat.
Halaber, 2025eko abendurako mobilizazio sozial handi baterako deia egingo dutela iragarri dute. Azkenik, bide honen parte izatera gonbidatu dituzte herritarrak, erakundeak, agintariak eta eragile politiko eta sozial guztiak. Jarraian, Idurre Eskisabel Larrañaga Euskalgintzaren Kontseiluko idazkari nagusiak irakurritako adierazpena. Ikusi hemen.
Aza
Durangaldeko Lanbide Heziketako zentro guztiek egin dute bat LANDUE zerbitzuarekin
2024an 15 enpresek egin dute bat Landue-rekin, eta gaur gaurkoz 38 enpresek osatzen dute Durangaldean euskara sustatzeko lan egiten duten enpresen komunitatea.
Landue proiektua Durangaldeko Mankomunitateak kudeatzen du, eta diruz laguntzen dute Bizkaiko Foru Aldundiak eta Eusko Jaurlaritzak. Zerbitzua Ahize-AEK hizkuntza aholkularitzak ematen du.
Sinadura ekitaldia egin zuten azaroaren 28an Durangoko Elkartegian, eta bertan egon dira Aitor Aldasoro Eusko Jaurlaritzako Hizkuntza Politikako sailburuordea, Isaak Amezaga Bizkaiko Foru Aldundiko Euskara Zuzendari Nagusia eta Idoia Otaduy Durangaldeko Mankomunitatearen presidentea. Baita Mertxe Mugika Ahize-AEKko hizkuntza aholkularia ere.
Lanbide Heziketako praktikak euskaraz egiteko bidea
Landue proiektuaren aurtengo nobedade azpimarragarriena izan da eskualdeko Lanbide Heziketako zentro denek bat egin izana. Horrek praktikak euskaraz egin ahal izateko bidea argitu duela azaldu dute sustatzaileek, eta Durangalde mailako erronka
hor kokatu dute. Hain zuzen, arlo horretan egindako esperientzia onak partekatzeko mahai ingurua egin dute ekitaldian.
Landue zerbitzuak urteroko argazkia berritu du gaurkoan. Gaur gaurkoz, honako enpresa hauek osatzen dute Landue komunitatea: Azterlan, Lantegi Batuak, Bruss, Baque, Zornotza LH, Iurreta LH, Maristak, Ibaizabal ikastola, Txirula, Dendak Bai, Durangaldeko Enpresarien Elkartea, Asca, Tabira Berezi, Gure Kide, Bermeosolo, Lasuen, Malda Bike, Urkiola Landa Garapena, Sorland, DEK, Hirukobat, Gerediaga elkartea, Begilan, Garaiko landetxea, Saltsan Katering, Bikain, Ona, Kultiba, Aisilan, Inforlur. Eiser, Eixu Artisauen Elkartea, Urkilan, Macober, Delikatetxe, Oarbeaskoa, Lantegia, Inmediobai eta Kirolene.
Aza
AEK-Korrikak bat egiten du EHEk deitutako manifestazioarekin
Euskaldunon aurkako oldarraldiaren eta faxismoaren gorakadaren aurrean eta Euskararen Errepublikaren alde manifestatzera deitu du Euskal Herrian Euskarazek, abenduaren 7an Durangon.
AEKk atxikimendua adierazi dio agerraldiari, eta dei egin die AEKideei manifestazioan parte hartu dezaten.
Hitzordua dugu, beraz, abenduaren 7an, 18:00etan, Landako Gunean.
Euskara eroso bizitzeko, euskararen errepublika!
Aza
Arratian, eusGara: lana eta euskara elkarlanean
Urtetik urtera handitzen ari da eusGara komunitatea. Arratiako arlo sozioekonomikoan euskararen erabilera areagotzeko asmoarekin sortutako proiektua da, eta gaur gaurkoz 33 enpresek* osatzen dute. Iaztik hona lau enpresa berrik hartu dute konpromisoa euskara gehiago erabiltzeko: Bela Detail, Keia, Ortomobility eta Petardos CM. Enpresa horiek guztiek familia argazkia berritu dute gaur goizean Zeanuriko Zulaibar campusean egin den hitzarmen ekitaldian. Bertan elkartu dira eusGara komunitateko kide diren 33 enpresatik 20.
2025ean euskararen erabilera areagotzeko konpromisoa hartu dute komunitateko 33 enpresek, eta eskura izango dituzte eusGarak eskaintzen diendoako zerbitzua: besteak beste, itzulpen zerbitzua, hizkuntza aholkularitza, diru-laguntzen kudeaketa, edo trebakuntza saioak. Zerbitzua Errota fundazioak sortu zuen 2017an, eta orduz geroztik berak kudeatzen du. Finantzazio publikoa, dena den, Bizkaiko Foru Aldunditik eta Eusko Jaurlaritzatik jasotzen du, Arratiako udaletakoaz aparte. Zerbitzua Ahize-AEK hizkuntza aholkularitzak eman du hasieratik. Sinadura ekitaldian izan dira proiektuaren bultzatzaile diren erakundeetako ordezkari nagusiak: Kizkitza Aurrekoetxea Errota fundazioko koordinatzailea; Aitor Aldasoro Eusko Jaurlaritzako Hizkuntza Politikarako sailburuordea; eta Isaac Amezaga Bizkaiko Foru Aldundiko Euskara zuzendari nagusia. Horiez gain, bailarako udaletako ordezkariak ere bertan izan dira. Baita Ahize-AEKko teknikari Mertxe Mugika eta Lander Muñagorri ere.
Euskara zaintza sektorean
Arratiako Egoitzak, Jandonizek eta Piedade Ondok iaz hartutako konpromisoari tiraka, hiru lanketa abiatu dituzte 2024an: praktikak euskaraz egiteko bidea abiatuko zutela; egoitzetan kontuan hartzea zainduak izango diren pertsonen eta senideen hizkuntza hautuak; eta egoitzetako langileentzako oinarrizko hiztegi bat sortzea ezagutza handitzeko.
Praktika onak
Alinar Die Casting eta Industrias Galarza enpresek aurten egindako praktika onak aurkeztu dituzte: hizkuntza irizpideak zehazteko prozesua, eta Berbatratuak izeneko dinamika, hurrenez hurren.
eusGara Komunitatea
Aurten, Arratiako 4 enpresek egin dute bat zerbitzuarekin, eta horiekin 33 dira eusGara komunitateko kide. Gaur gaurkoz, honako hauek dira eusGara zerbitzuarekin bat egin duten enpresak: Alfe Cutting, Alinar, Amorrortu, Arbegui, Arbisa, Arratiako Egoitza, Autos Varela, Batz, Behingoz, Bela Detail, Carrocerias Joseba, Carrocerias Usansolo, Cementos Lemona, Comecaran, Ekin Eraiketak, Etxegana hotela, Gorbeialde landa garapeneko elkartea, Ilunbe, Industrias Galarza, Jandoniz, Keia, Lur 2000, Ormaurre, Ormazabal, Ortomobility, Petardos CM, Piedade Ondo, Rotulos Usansolo, Tresnak, Wolco, Zuhaitz Etxeak, Zulaibar Lanbide Ikastegia eta Zuloaga Motor.
Aza
Jendaurrean.eus: erakundeek euskaraz komunikatzeko gidaren aurkezpena
Jendaurrean egitasmoaren egitasmoaren bukaera ekitaldia izan da gaur (azaroak 22) Donostian. Bertan erakundeek euskaraz komunikatzeko gidaren aurkezpena egin dute.
Proiektua duela 8 bat urte jaio zen, Soziolinguistika Klusterraren eta EHUren eskutik, eta AEKk bertan parte hartu izan du, jendaurreko komunikazioetan euskaraz (ere) aritzeko baliabideak, tresnak eta jokaerak landu ziren bertan. Erakundeek edota bestelako eragile publikoek beraien ezagutzak eta zalantzak elkarren artean partekatzen ziren, jendaurreko euskarazko komunikazioa errazago, hobea eta eraginkorra egite aldera.
Ekitaldian, Nazio Kontseiluko kide Aize Otaño Lizarraldek eta Komunikazio Saileko kide Helios del Santo Gómezek hartu dute parte.